"მანჩესტერ იუნაიტედის" ნახევარმცველი "ლივერპულთან" დასრულებულ გამარჯვებათა სერიას მხოლოდ მორიგ დაკარგულ ორ ქულად მიიჩნევს და არა რეკორდის დამყარების შანსის ხელიდან გაშვებას.

"წითლები" ზედიზედ 9 მატჩის განმავლობაში ახერხებდნენ მოგებას ყველა ტურნირის მასშტაბით, პრემიერ ლიგაში კი 6-მატჩიანი მოგებათა სერია ჰქონდათ, რაც "ოლდ ტრაფორდზე" კვირას ჩატარებულ მატჩში დასრულდა.

სომეხი ნახევარმცველი არ ფიქრობს, რომ რეკორდების დამყარებას ფეხბურთში მნიშვნელობა ენიჭება და პირობას დებს, რომ გუნდი მომდევნო ტურში "სტოკ სიტისთან" ეცდება ახალი წარმტებული სერიის დაწყებას.

"რა თქმა უნდა, ვეცდებით, რატომაც არა? უნდა მოვიგოთ, მომდევნო მატჩი უნდა მოვიგოთ. რეკორდებისთვის არ ვიბრძვით, ჩვენ ჩვენს საქმეს ვაკეთებთ, რათა ოთხეულში შევიდეთ და ამისთვის მოგებებია საჭირო. რეკორდებზე არ უნდა იფიქრო, რადგან ისინი ერთ დღეს დაემხობიან. ჩვენ მხოლოდ ჩვენს საქმეს ვაკეთებთ და ყველა მატჩის მოგებას ვცდილობთ".

იურგენ კლოპის გუნდის წინააღმდეგ "წითლები" პირველ ტაიმში 11-მეტრიანი დარტყმიდან გაშვებული გოლით მარცხდებოდნენ, მაგრამ შეხვედრის 84-ე წუთზე ზლატან იბრაჰიმოვიჩმა წონასწორობა აღადგინა და მატჩის საბოლოო ანგარიში დააფიქსირა.

მხითარიანი მოხარულია გულშემატკივართა მხარდაჭერით, რომელმაც გუნდი გამარჯვების მოსაპოვებლად წააქეზა, თუმცა "იუნაიტედმა" ეს ვერ შეძლო.

"საოცარი ატმოსფერო იყო. მინდა, ასეთი ატმოსფერო ხშირად ვიხილო სტადიონზე. მადლობა გულშემატკივრებს. ჩვენი სჯეროდათ და ბოლომდე მხარს გვიჭერდნენ."

რაც შეეხება უშუალოდ მატჩს, მხითარიანმა განაგრძო: "შესაბამისი შედეგი არ იყო, მაგრამ 1-0 ვმარცხდებოდით, ასე რომ, ცუდი შედეგიც არ იყო. მოგება შეგვეძლო, წაგებაც შეგვეძლო, მაგრამ გამარჯვება უფრო დავიმსაუხრეთ, რადგან გუნდურად კარგად ვითამაშეთ და მატჩის მოსაგებად ჩვენი მაქსიმუმი გავაკეთეთ.

ბოლოს ანგარიში 1-1 გახდა, ამიტომ უფრო მეტად შევუტიეთ და ბადის შერხევა მეორეჯერ მოვინდომეთ, მაგრამ, სამწუხაროდ, ვერ შევძელით. 1-1 ცუდი შედეგი არ არის, რადგან ოთხეულთან ჯერ კიდევ ახლოს ვართ და მომდევნო მატჩში ჩვენს მაქსიმუმს გავაკეთებთ".

მარუან ფელაინიმ მატჩში საგრძნობი გავლენა მოახდინა, რამეთუ მისმა თავურმა დარტყმამ გამოიწვია გოლი, რომელმაც ანგარიში გაათანაბრა.

"არა მარტო მარუანმა, არამედ უეინ რუნიმაც და ხუან მატამაც შესძინეს გუნდს ახალი ძალა. წინ ძალიან გვეხმარებოდნენ და ბედნიერები ვართ, რომ ჩვენი თამაშის შეცვლა შეუძლიათ. გვიხარია, რომ სკამზე ასეთი ფეხბურთელები გვყავს".