ზლატან იბრაჰიმოვიჩი აღნიშნავს, რომ "ლივერპულთან" მატჩში მის გუნდს საუკეთესო თამაში არ უჩვენებია, მაგრამ ფეხბურთელებმა მეორე ტაიმში სულისკვეთება გამოავლინეს.

"წითლები" ჯეიმის მილნერის მიერ გატანილი 11-მეტრიანის შემდეგ მარცხდებოდნენ, მაგრამ "ოლდ ტრაფორდის" მკვიდრებმა შვედის მიერ გატანილი სეზონის მე-19 გოლით ანგარიშის გათანაბრება მოახერხეს.

იბრაჰიმოვიჩს მიაჩნია, რომ მის გუნდს სამივე ქულის აღება შეეძლო, მატჩი ისეთივე მიდგომით რომ დაეწყო, როგორითაც დაასრულა.

"ერთი ქულა ავიღეთ და არ ვფიქრობ, რომ ჩვენი საუკეთესო თამაში ვაჩვენეთ. მძიმე ბრძოლა, მძიმე თამაში იყო და 1-0 ვმარცხდებოდით. ზეწოლას ვახდენდით და ვახდენდით, რამაც მატჩის მიმდინარეობა შეცვალა. მერე კი გავათანაბრეთ".

როცა ჰკითხეს, რა იყო პირველ ტაიმში ცუდად თამაში ბრალი, იბრამ უპასუხა: "რამდენიმე შეცდომა დავუშვით. მოწინააღმდეგის ზეწოლის ფონზე კომფორტულად ვერ ვგრძნობდით თავს და არასწორად ვითამაშეთ. პირველ ტაიმშიც ისე რომ გვეთამაშა, როგორც მეორეში, სულ სხვა მატჩი იქნებოდა.

მეორე ნახევარში უფრო პირდაპირები ვიყავით. უკნიდან არ ვთამაშობდით, წინ ვიწევდით და თამაში სიღრმეში გადავიტანეთ, რადგან მაღალ პრესინგს მიმართავდნენ. ჩვენს განლაგებაში ძალიან ბევრი შეცდომა იყო, ამიტომ მეორე ტაიმში წინ წასვლა გადავწყვიტეთ".

იბრაჰიმოვიჩმა ანტონიო ვალენსიას ჩაწოდებულით ისარგებლა და 84-ე წუთზე სიმონ მინოლეს კარი აიღო, რითაც "ოლდ ტრაფორდზე" ხმაური გამოიწვია.

"კარგი ჩაწოდება იყო. მეგონა, რომ ფელაინის დარტყმული ძელის შემდეგ კარში შევიდოდა, მაგრამ მეორე შანსიც მივიღეთ, ვალენსიამ კარგად ჩამიწოდა, მე იქვე დავრჩი და კარში გადავგზავნე."

"ლივერპულთან" ნაჩვენები შედეგი ნიშნავს, რომ "იუნაიტედის" ცხრამატჩიანი გამარჯვებათა სერია დასრულდა, მაგრამ გუნდი კვლავ დაუმარცხებელია და ეს სერია უკვე 16 მატჩს ითვლის ყველა ტურნირზე.

"მოგება გვინდოდა, რა თქმა უნდა - ყველა თამაშის მოგება და ჩამორჩენის შემცირება გვინდა, უფრო მეტიც - მაგრამ, არა უშავს, 1-1 დასრულდა და ასევე გავაგრძელებთ. 16 მატჩია არ წაგვიგია - ჯერ კიდევ აქ ვართ".

წყარო: manutd.com