კრის სმოლინგს მიაჩნია, რომ "ლივერპულთან" მატჩის წინ "მანჩესტერ იუნაიტედის" ფეხბურთელებს იმაზე მეტი თავდაჯერებულობა ვერც კი ექნებოდა, რაც ზედიზედ ცხრა გამარჯვებამ შესძინათ.
ინგლისის ლიგის თასზე "ჰალ სიტისთან" ხუან მატასა და მარუან ფელაინის გოლებით მოპოვებული გამარჯვება ჟოზე მოურინიოს გუნდისთვის ზედიზედ მეცხრე გამოდგა ყველა ტურნირზე, საერთო ჯამში კი "იუნაიტედი" 15 მატჩია დაუმარცხებლად ასპარეზობს.
"იუნაიტედის" ყურადღება ახლა მთლიანად "ლივერპულთან" მატჩზეა გადატანილი და სმოლინგი აღნიშნავს, რომ გუნდის წევრები მატჩის მნიშვნელობას შესანიშნავად აცნობიერებენ.
"შაბათს "რედინგთან" მატჩამდე ვიცოდით, რომ წინ სამი მატჩი გვქონდა სამ სხვადასხვა ტურნირზე. ვიცოდით, რომ გამარჯვებების სერიის შენარჩუნების შემთხვევაში უფრო მეტი თავდაჯერებულობა ვერც კი გვექნებოდა სეზონის ერთ-ერთი უდიდესი მატჩის წინ. ყველა მოუთმენლად ელის.
ახლა ჩვენი ყურადღების მომდევნო მატჩზე გადატანა შეგვიძლია. ვფიქრობ, ოთხშაბათს ფორმას აღვიდგენთ, მერე კი რამდენიმე დღე გვექნება ტაქტიკაზე მუშაობისთვის, რათა გავერკვეთ, როგორ უნდა გავანეიტრალოთ ისინი და სერიის შესანარჩუნებლად ჩვენი თამაში ვითამაშოთ. ვიცით, რამდენად მნიშვნელოვანია ეს მატჩი ტურნირის ზედა ნაწილის გათვალისწინებით", - განაცხადა სმოლინგმა.
27 წლის მცველი ორთვიანი უქმობის შემდეგ დაუბრუნდა მოედანს, მაგრამ "ჰალ სიტისთან" მატჩი მისთვის ზედიზედ მეოთხე შეხვედრა გამოდგა ბოლო პერიოდში.
"თავს ძალიან კარგად ვგრძნობ. სეზონის დასაწყისში აღმაშფოთებელი იყო, მაგრამ ახლა ფორმაში ვარ და ამ ბევრ მატჩში დაბრუნება კარგია. იმედი მაქვს, ჩემს წვლილს შევიტან და თამაშს გავაგრძელებ".