"ტოტენჰემის" ცენტრალური მცველის, ტობიას ალდერვეირელდის მომავალი სპეკულაციის საგნად შეიძლება იქცეს, რამეთუ ცნობილი გახდა, რომ ბელგიის ნაკრების ფეხბურთელის გამოსყიდვა ფიქსირებულ 25.4 მილიონ ფუნტად არის შესაძლებელი.

ალდერვეირელდი 2015 წლის ზაფხულში "საუთჰემპტონიდან" გადავიდა "უაით ჰარტ ლეინზე" და მისი ტრანსფერი "მამლებს" 11.5 მლნ. ფუნტი დაუჯდათ. მას შემდეგ ტობიმ პრემიერ ლიგის ერთ-ერთი გამორჩეული ფეხბურთელის სახელი დაიმკვიდრა.

ჩავარდნა, რომელიც მაურისიო პოჩეტინოს გუნდს დაეწყო ბოლო კვირებში, მეტწილად 27 წლის მცველის ტრავმასთანაა დაკავშირებული - თავისი ბელგიელი ცენტრალური მცველის გარეშე "ტოტენჰემმა" პრემიერ ლიგის 11 მატჩიდან მხოლოდ 2 მოიგო, ამის გარდა, ნაადრევად გავარდა ჩემპიონთა ლიგიდან.

"დეზების" პრობლემა კი ახლა უფრო სერიოზულია, რამეთუ მათ ლიდერის დაკარგვის საშიშროება აქვთ. Football Leaks-ი აქვეყნებს ინფორმაციას იმის შესახებ, რომ ალდერვეირელდის კონტრაქტი ფიქსირებულ გამოსასყიდ თანხას შეიცავს.

თუ ეს სიმართლეა, მადრიდის "ატლეტიკოს" ყოფილი მცველისადმი ინტერესს უთუოდ გამოავლენენ ისეთი გუნდები, როგორიც "მანჩესტერ იუნაიტედი", "ლივერპული" და "მანჩესტერ სიტი" არიან, რომელთაც დაცვის ხაზის გაძლიერება ესაჭიროებათ.

წყარო: mirror