"მანჩესტერ იუნაიტედის" მთავარი მწვრთნელი ჟოზე მოურინიო იანვარში ეცდება ხოსე ხიმენესის, მადრიდის "ატლეტიკოს" ცენტრალური მცველის გადაბირებას.

მოურინიოს გუნდის ერთ-ერთი ყველაზე სუსტი ზონა დაცვის ცენტრალური ხაზია. ამის დასტურად საკმარისია ითქვას, რომ პრემიერ ლიგის 12 ტურში გუნდმა 14 გოლი გაუშვა, რაც ერთით ნაკლებია გადარჩენისთვის მებრძოლი "მიდლსბროს" შედეგზე.

გარდა ამისა, მოურინიოს ხშირად უხდება ცენტრალური მცველების წყვილის შეცვლა, რადგანაც კრის სმოლინგი და ერიკ ბაიი ტრავმირებულები არიან. მაგალითად, ამჟამად ჟოზეს არჩევანი მარკოს როხოსა და ფილ ჯონსზე ჩერდება.

ESPN-ი იტყობინება, რომ იანვრის მოახლოებასთან ერთად, მოურინიოს ცენტრალური მცველის შეძენის სურვილი უძლიერდება. პორტუგალიელმა უკვე მიმართა მადრიდელებს ხიმენესისა და მისი თანაგუნდელის, დიეგო გოდინის თაობაზე.

გამოცემა თავის მანჩესტერულ და მადრიდულ წყაროზე დაყრდნობით იტყობინება, რომ "ატლეტიკო" გოდინს არავითარ შემთხვევაში არ გაყიდის სეზონის შუა პერიოდში, მაგრამ 21 წლის ხიმენესის გასხვისების საკითხი შეიძლება განიხილოს.

ახალგაზრდა ურუგვაელი ვეღარ ხვდება გუნდის სასტარტო შემადგენლობაში, რაც ჭორების თანახმად, დიეგო სიმეონესთან პირადი კონფლიქტითაა გამოწვეული. მოსალოდნელია, რომ ესპანელები დაახლოებით 34-42 მილიონ ფუნტს მოითხოვენ ფეხბურთელში.

იგივე წყაროები იტყობინებიან, რომ მოურინიოს სათადარიგო ვარიანტად "საუთჰემპტონის" მცველი ჟოზე ფონტე ესახება. "ეშმაკები" მარჯვენა მცველის შეძენასაც აპირებენ იანვარში და მათი არჩევანი "მონაკოელ" ფაბინიოზე შეჩერდება.

წყარო: espn