"მანჩესტერ იუნაიტედის" მთავარმა მწვრთნელმა ჟოზე მოურინიომ კიდევ ერთხელ გაგზავნა სკაუტები "სელტიკის" ფორვარდზე, მუსა დემბელეზე დასაკვირვებლად, რადგანაც ზამთრის სატრანსფერო ფანჯარაზე მის შეძენას აპირებს.

Daily Mail-სთვის ცნობილი გახდა, რომ "წითელი ეშმაკების" სკაუტი დევიდ ფრიიო სპეციალური დავალებით იმყოფებოდა საფრანგეთისა და ინგლისის ახალგაზრდული ნაკრებების მატჩზე, რომელიც ორშაბათს საღამოს გაიმართა და რომელშიც დემბელემ დუბლი შეასრულა.

ამგვარად, მოურინიოს კიდევ ერთი მიზეზი მიეცა იმისათვის, რომ 20 წლის ფეხბურთელის შესაძენად ზამთარში საგრძნობი თანხა დახარჯოს. მოურინიო მუსას პირადი თაყვანისმცემელია და მას გასულ სეზონში ჯერ კიდევ "ფულჰემში" ასპარეზობისას აკვირდებოდა.

გამოცემა იტყობინება, რომ მოურინიო დემბელეში იმავე სტილსა და სათამაშო ხასიათს ხედავს, რასაც მის ყოფილ შეგირდში, დიდიე დროგბაში ამჩნევდა. ფეხბურთელისადმი დიდი ხნის ინტერესი "იუნაიტედს" ფავორიტად აქცევს ბრძოლაში, რომელშიც ასევე "მანჩესტერ სიტი", "არსენალი", "ჩელსი" და "ბაიერნია" ჩართული.

აღსანიშნავია, რომ გასულ ზაფხულს "სელტიკმა" მუსას შესაძენად მხოლოდ 500 ათასი ფუნტი გადაიხადა, მან კი შვიდი გოლი გაიტანა შოტლანდიის ჩემპიონატში, ხოლო 3 ჩემპიონთა ლიგაზე - მათ შორის 2 გოლი "სიტის" კარში. სექტემბერში 20 წლის ფეხბურთელმა ჰეთ-ტრიკი შეასრულა "რეინჯერსთან" მატჩში, რაც 1966 წლის შემდეგ არავის გაუკეთებია.

იანვარში დემბელეს გადაბირება საკმაოდ რთული იქნება, რადგან მას "სელტიკში" დარჩენა და შოტლანდიის ჩემპიონის ტიტულის მოგება სურს. თუმცა, "იუნაიტედის" ფინანსურ შესაძლებლობებს თუ გავითვალისწინებთ, შოტლანდიურ გრანდს თავისი ფეხბურთელის შენარჩუნება უნდა გაუჭირდეს.