"მანჩესტერ იუნაიტედის" მთავარი მწვრთნელი ჟოზე მოურინიო "ლივერპულთან" ნათამაშები უგოლო ფრით მოხარული დარჩა და მატჩის შემდეგ მნიშვნელოვან თემებზე კომენტარი გააკეთა.
თამაშს ჩვენ ვაკონტროლებდით
"ვფიქრობ, ჩვენთვისაც რთული მატჩი იყო და მათთვისაც, მაგრამ ასევე ვფიქრობ, რომ მათთვის უფრო რთული იყო, ვიდრე ჩვენთვის. შეხვედრის უმეტეს ნაწილს ჩვენ ვაკონტროლებდით. მეორე ტაიმში დავიდმა 2 დიდებული სეივი განახორციელა, რაც კონტექსტიდან ამოვარდნილი იყო. მაგრამ თამაშს მთლიანად ვაკონტროლებდით, არა მარტო ტაქტიკური თვალსაზრისით, არამედ ემოციურითაც. სტადიონის ატმოსფერო ჩვენ შევქმენით".
ერთი კარგი მომენტი
"დიდებული მომენტი გვქონდა, რომელიც, ჩემი აზრით, ზლატანს უნდა გამოეყენებინა; გაიტანე და 1-0, ნახვამდის, ყველაფერი დასრულდა. მაგრამ მატჩის შუა ნაწილში სიმწვავე დავკარგეთ. ხელსაყრელ დროს ველოდი და ზლატანის უკან რაშფორდის გამწესებაზე ვფიქრობდი, მაგრამ ტკივილებმა შეაწუხა და შეცვალე. იმ მომენტში უკვე ვფიქრობდი, რომ მოგება გაგვიჭირდებოდა, ამიტომ უმთავრესი იყო არ წაგვეგო".
მოხარულია, რომ ბურთს მუდმივად არ ფლობდა
"სწორედ ასე თამაშს ვგეგმავდით. არ გვინდოდა ბურთს მთელი თამაშის განმავლობაში დავუფლებოდით. ვიცოდით, რომ ჩვენს პირველ ფაზაზე ზეწოლას მოახდენდნენ და ვიცოდით, რომ ბურთის დაკარგვისას უმაღლეს დონეზე მოახდენდნენ გარდაქმნას. ვიცოდით, რომ გოლის გატანა ძალიან გაუჭირდებოდათ; რაზეც ყოველთვის ვფიქრობდით, ის იყო, რომ მატჩის მოსაგებად უნდა გაგვეტანა, რაც ვცადეთ კიდეც."
მსოფლიოს უკანასკნელი საოცრება ნამდვილად არ არის
"ორივე ტაიმის ძლიერად დაწყება ვცადეთ, მაგრამ კარგი გუნდი ჰყავთ. თქვენ როგორც იტყვით ხოლმე, მსოფლიოს უკანასკნელი საოცრებაო, ნამდვილად არ არის, მაგრამ ძალიან კარგი გუნდი ჰყავს, ასე რომ, ამას უნდა შევეგუოთ".