ინგლისის ნაკრების მთავარი მწვრთნელის მოვალეობის დროებითმა შემსრულებელმა გარეთ საუთგეითმა გააკრიტიკა გულშემატკივრები, რომელთაც მალტასთან მატჩში რუნის სათადარიგოთა სკამზე დაყენება სურდათ.

მიუხედავად იმისა, რომ "მანჩესტერ იუნაიტედის" ძირითად შეადგენლობაში რუნი ვეღარ ხვდება, ნაკრების მატჩი მან პირველივე წუთებიდან დაიწყო. პასუხად, "უემბლიზე" შეკრებილი გულშემატკივრები 30 წლის ფეხბურთელს უსტვენდნენ.

2:0 მოგებული მატჩის შემდეგ საუთგეითმა გულშემატკივართა ასეთი ქმედების გამო უკმაყოფილება გამოხატა. მისი აზრით, სტვენა "სამ ლომთა" საუკეთესო ბომბარდირს ნამდვილად არ დაეხმარება ფორმის დაბრუნებაში.

"რუნისადმი მიმართული კრიტიკა უსამართლოა. თავისი ქვეყნის ნაკრებში სიამაყით თამაშობს, კაპიტნის სამკლაურს ამაყად ატარებს.

წარსულს ვიხსენებ და ტერის, ლამპარდისა და ეშლი კოულის მაგალითი მაგონდება. მათაც ხშირად აკრიტიკებდნენ, მაგრამ გუნდის გამო თავს სწირავდნენ. ბევრი არ იქცეოდა ასე და ნაკრებს ტოვებდა.

ამ ბიჭებს თავგამოდებით სურდათ ინგლისის ნაკრებში თამაში. რუნიც მათ შორისაა. მის მიმართ სტვენას ვერ ვიგებ, ვერ ვხვდები, ეს როგორ დაეხმარება", - განაცხადა საუთგეითმა.