Sunday People-ის მტკიცებით, "ლესტერ სიტი" "მანჩესტერ იუნაიტედში" დენი დრინქუოტერის დაბრუნების სანაცვლოდ მორგან შნეიდერლინის გადაბირებას მოითხოვს.
26 წლის ინგლისელი "წითლების" სამიზნეა და მის გადაბირებას იანვარში ეცდებიან, თუმცა პრემიერ ლიგის ჩემპიონებს სულაც არ სურთ ნახევარდაცვის ლიდერთან განშორება, რის გამოც მოთამაშე 20 მლნ. ფუნტად შეაფასეს დამატებით სხვა ფეხბურთელთან ერთად.
დრინქუოტერი, რომელიც "მანჩესტერ იუნაიტედის" აკადემიის აღზრდილია, "ოლდ ტრაფორდზე" დაბრუნების სურვილს გამოთქვამს მიუხედავად იმისა, რომ ახლახანს გააფორმა ახალი კონტრაქტი, რომლის თანახმადაც კვირაში 90 ათასი ფუნტი აქვს ხელფასის სახით.
ინგლისელის კლუბი კი "იუნაიტედს" გარიგების განხორციელების სანაცვლოდ მორგან შნეიდერლინის თავის რიგებში გაშვებას მოსთხოვს.
ფრანგი ნახევარმცველი ჟოზე მოურინიოს გუნდის ძირითადი შემადგენლობის წევრად არ ითვლება და როგორც მოსალოდნელია, მას კლუბიდან წასვლის საშუალებას მისცემენ.