ჟოზე მოურინიომ მატჩისწინა პრესკონფერენცია გამართა, სადაც ფეხბურთელებს საკუთარ თავებზე კონცენტრაციისკენ მოუწოდა. პორტუგალიელი სპეციალისტი თვლის, რომ ის გუნდთან ერთად მზადაა პირველი დერბისთვის.

"ჩემი მესიჯი ფეხბურთელების მიმართ ყოველთვის არის ის, რომ გუნდმა საკუთარი იდენტობა უნდა აჩვენოს. ყველა თამაშში უნდა ვცადოთ რომ ვიყოთ ის, ვინც ნამდვილად ვართ. ჩვენ ოპონენტებზე ძლიერები ვართ, უფრო შთამბეჭდავად ვთამაშობთ, ვიდრე მოწინააღმდეგე. საკუთარ თავებზე მაქსიმალური კონცენტრაცია უნდა მოვახდინოთ.
მინდა მათ ყოველგვარი საზღვრების გარეშე ითამაშონ და მაქსიმალურად ეცადონ სასურველი შედეგის მიღწევას. "ჰალთან" მატჩი ჩვენი ასეთი სულისკვეთების კარგი მაგალითია, ფეხბურთელებმა ბოლო წამამდე იბრძოლეს. სწორედ ეს არის ის "მანჩესტერ იუნაიტედი", რომლის გაწვრთნაც მსურს." - აცხადებს "იუნაიტედის" ახალი მენეჯერი.

მოურინიო თვლის, რომ არსებობს ერთი ბრძოლა, რომელსაც "იუნაიტედი" აუცილებლად მოიგებს.

"მოედანზე თერთმეტი-თერთმეტის წინააღმდეგ ვიქნებით, მაგრამ ტრიბუნებზე 70 ათასი სამი ან ოთხი ათასის წინააღმდეგ. ეს გამარჯვებისთვის მოტივაციას გვმატებს. "საუთჰემპტონთან" მატჩი არ ყოფილა დერბი, ეს იყო თამაში პრემიერ ლიგის ორ კლუბს შორის და მხარდაჭერა საოცარი იყო. ენთუზიაზმი და ურთიერთობა ფანებსა და ფეხბურთელებს შორის დაუჯერებელია. "ჰალთანაც" სულ რამდენიმე ათასი გულშემატკივრით ვითამაშეთ, მაგრამ მათი მხარდაჭერა დაუჯერებელი იყო. ასე რომ, ამ თემასთან დაკავშირებით კითხვები ზედმეტია, დარწმუნებული ვარ, რომ ფანები გუნდისთვის კვლავ ფანტასტიკურები იქნებიან" - დაასრულა მოურინიომ.

წყარო: manutd.com