ტურინელები შეთავაზებულ თანხას არ სჯერდებიან.
"მანჩესტერ იუნაიტედმა" ტურინის "იუვენტუსს" პოლ პოგბასთვის 110 მლნ. ევრო შესთავაზა, რაც წინა შეთავაზებასთან შედარებით 10 მილიონით გაზრდილი თანხაა, მაგრამ სერია A-ს ჩემპიონები არც ამ თანხას სჯერდებიან, რადგანაც საუკეთესო ფინანსური მოგების მიღება სურთ. "იუვე" კიდევ 10 მლნ. ევროს დამატებას ითხოვს და "იუნაიტედს" აცნობა, რომ "ნაპოლიდან" გონსალო იგუაინის 95 მლნ. ევროდ შეძენა სულაც არ ნიშნავს იმას, რომ პოგბას აუცილებლად გაყიდის.
ფრანგი ფეხბურთელის აგენტმა, მინო რაიოლამ "იუნაიტედთან" ხუთწლიანი კონტრაქტის პირობებზე მოლაპარაკებები უკვე გამართა და როგორც ცნობილია, მისი მოთხოვნები დაკმაყოფილებულია. მაგრამ "იუნაიტედს" კიდევ ერთხელ მოუწევს ჯიბეზე ხელის გასმა, რათა დაიბრუნოს ფეხბურთელი, რომელმაც 2012 წელს კლუბი უსასყიდლოდ დატოვა.
თუკი შეთანხმება შედგება, პოგბა ხელფასის სახით წელიწადში 11 მლნ. ფუნტს მიიღებს და ამას დაემატება მისი სასპონსორო და საიმიჯო შეთანხმებები. 23 წლის ფეხბურთელი, რომელიც ამჟამად არდადგებზე იმყოფება, "იუვენტუსთან" 2018/19 წლების სეზონამდეა დაკავშირებული კონტრაქტის მიხედვით, მაგრამ "ოლდ ტრაფორდზე" დაბრუნების წინააღმდეგი არ არის და ამ გადაწყვეტილებაში ისიც კი არ უშლის ხელს, რომ "იუნაიტედი" ჩემპიონთა ლიგაზე მომდევნო სეზონში ვერ ითამაშებს. პოგბა მოურინიოს მეოთხე შენაძენი იქნება "წითელ ეშმაკებში", თუმცა მწვრთნელს ფრანგის ალტერნატიული ვარიანტიც აქვს.
რაიოლას წილი, რომელიც "იუვენტუსისთვის" გადახდილი თანხის მეხუთედი იქნება, ასევე "იუნაიტედის" გადასახდელია, მაგრამ შეთანხმების წვრილმანი დეტალები ჯერჯერობით უცნობია, რადგან მოლაპარაკებები არ დასრულებულა.
შეგახსენებთ, რომ პოგბა "იუნაიტედის" აკადემიაში 2009 წელს "ლე ჰავრედან" მოხვდა, მაგრამ სერ ალექს ფერგიუსონის გუნდში სათამაშო დრო არ მიეცა, რის შემდეგაც მან კონტრაქტის გახანგრძლივებაზე უარი განაცხადა და "იუვენტუსში" უფასოდ გადავიდა, სადაც ერთ-ერთ საუკეთესო ნახევარმცველად აღიზარდა.
წყარო:
theguardian