"მანჩესტერ იუნაიტედის" ახალგაზრდა მცველები ტაილერ ბლეკეტი და გილერმო ვარელა, სავარაუდოდ, კლუბს დატოვებენ, რადგან ჟოზე მოურინიო მათ კლუბში ზედმეტად თვლის.

არც ცენტრალური მცველი ბლეკეტი და არც მარჯვენა მცველი ვარელა არ ვარჯიშობენ "იუნაიტედის" პირველ გუნდთან ერთად, რადგან ისინი არ შედიან "წითლების" ახალი მწვრთნელის, ჟოზე მოურინიოს სამომავლო გეგმებში.

მოურინიო აპირებს კლუბის აკადემიიდან ახალგაზრდების დაწინაურებასა და მათთვის პირველ გუნდში გარკვეული სათამაშო დროის მიცემას. აქსელ ტუანზებესა და ტიმოთი ფოსუ-მენსას სახით მას უკვე ჰყავს გარკვეული მოთამაშეები ამისთვის.

ორივე ზემოაღნიშნულ მოთამაშეს შემდეგ სეზონში თავის გამოჩენის საშუალება ექნება, რადგან მათ სხვებთან შედარებით განვითარების ყველაზე დიდი პოტენციალი გააჩნიათ.

ფოსუ-მენსა პირველ გუნდში ლუი ვან გაალის ხელმძღვანელობით მოხვდა და 10 ოფიციალური შეხვედრის ჩატარება მოახერხა. მან დიდი როლი ითამაშა "არსენალის", "მანჩესტერ სიტისა" და "ევერტონის" წინააღმდეგ მოპოვებულ გამარჯვებებში.

როგორც ცნობილია, ჰოლანდიის ასაკობრივი ნაკრების წევრს შეუძლია ითამაშოს ყველა დაცვით პოზიციაზე და საყრდენ ნახევარმცველად, მაგრამ სავარაუდოა, რომ მოურინიო თავის გამოჩენის საშუალებას მას მარჯვენა მცველის პოზიციაზე მისცემს .

რაც შეეხება აქსელ ტუანზებეს, იგი კონგოს რესპუბლიკაში დაიბადა და გაიზარდა როქდეილში. "იუნაიტედის" ახალგაზრდული გუნდის მწვრთნელები მას ახასიათებენ, როგორც ლიდერის თვისებების მქონე მოთამაშეს, რადგან იგი კაპიტნობდა 18-წლამდელთა გუნდს.

ტუანზებე ასევე საკვანძო ფიგურა იყო 21 წლამდე გუნდშიც, მაგრამ ჯერჯერობით "იუნაიტედის" პირველ გუნდში დებიუტი არ ჰქონია, თუმცა ეს საშუალება მას ჟოზე მოურინიოს ხელმძღვანელობის დროს მიეცემა.

წყარო:SkySports