"მანჩესტერ იუნაიტედის" მესამე და, ჯერჯერობით, ზაფხულის ბოლო შენაძენი, სომეხი ჰენრიკ მხითარიანი, ყოფილი კლუბისთვის მართლაც უძვირფასესი და უმნიშვნელოვანესი ფეხბურთელი იყო, მას ბოლო 3 სეზონის განმავლობაში სხვადასხვა პოზიციებზე მოუწია თავის წარმოჩენა და ყოველ მათგანზე საკმაოდ პროდუქტიულიც იყო.

გულშემატკივარი მოუთმენლად ელის, თუ სად გაამწესებს ჟოზე მოურინიო "იუნაიტედის" ახალწვეულს და როგორ მოერგება იგი გუნდს, თუმცა თუკი განვლილ სეზონებს გადავხედავთ, აღმოვაჩენთ, რომ "დორტმუნდის ბორუსიას" რიგებში ჰენრიკი ყველაზე ხშირად ფლანგზე ირჯებოდა.

მხითარიანმა გასულ სეზონში 24 შეხვედრა ჩაატარა მარჯვენა ვინგერის პოზიციაზე, საიდანაც 10 გოლის გატანა და 17 საგოლე გადაცემის გაკეთება შეძლო, მარცხენა ფლანგზე გატარებულ 21 შეხვედრაში კი მისი მაჩვენებლები 12-12 გოლი და საგოლე პასია. ჰენრიკმა 10-იანის პოზიციაც მოირგო, კონკრეტულად კი 6-ჯერ და ერთხელაც ცრუ ფორვარდობა შეითავსა, ეს კი ოქტომბერში "ბაიერნის" წინააღმდეგ მოხდა, როდესაც "ყვითელ-შავები" შერცხვნენ და 5-1 დამარცხდნენ.

2014/15 წლების სეზონშიც თითქმის წინა წლის მსგავი სიტუაცია იყო სომეხის თავს. მან 22 მატჩი მარჯვენა ფლანგზე დაიწყო, 16-ჯერ მარცხენა ვინგერად დასაქმდა, ხოლო ცენტრალურ ზონაში თითო-ოროლა შეხვედრა გამართა. ჰენრიკი მხოლოდ ბოლო სეზონებში ჩამოყალიბდა ფლანგის შემტევად, რადგან მისი გერმანული კარიერა ცენტრალური შემტევი ნახევარმცველობით დაიწყო.

"სიგნალ იდუნა პარკზე" გადაბარგებამდე მხითარიანი უკრაინაში, კერძოდ, "დონეცკის შახტარში" ასპარეზობდა და სწორედ ამ გუნდში წარმოაჩინა საკუთარი თავი საუკეთესოდ. უკრაინაში იგი შემტევი ნახევარმცველის პოზიციაზე თამაშობდა, რომელიც მოედნის შუიდან მოქმედებდა და თავდამსხმელებსა და სხვა შემტევებს ტექნიკისა და მოედნის არაჩვეულებრივი ხედვის დახმარებით, აკურატული პასებით ამარაგებდა.

საერთაშორისო არენაზე მისი გამოყენების არეალი კიდევ უფრო იზრდება. იგი სომხეთის ეროვნული ნაკრების კაპიტანი, ლიდერი, მთავარი დამრტყმელი ძალა და მამოძრავებელია. 4 უკანასკნელ შეხვედრაში მან 4 სხვადასხვა პოზიცია მოირგო ეროვნულ ნაკრებში (შემტევი ნახევარმცველი, მარჯვენა ფლანგელი, მარცხენა ფლანგელი, ცენტრალური ნახევარმცველი).

ერთი რაც უცხადესია, მოურინიო მის ცენტრფორვარდად გამოყენებას,ალბათ, არასდროს შეეცდება, თუმცა ფლანგიდან შეუტევს თუ ცენტრიდან ჰენრიკ მხითარიანი, ჯერაც გამოცანად რჩება. ყველაფერი თავად ჟოზეზეა დამოკიდებული, თუმცა რა ფორმაციაც არ უნდა აირჩიოს ტაქტიკების მასტერმა, მხითარიანი ყველაფრისთვის მზად უნდა იყოს, რათა გულშემატკივარისა და, პირველ რიგში, მწვრთნელის იმედები გაამართლოს.