ხუთი წლის წინ ზუსტად ამ დღეს (29 ივნისს) "მანჩესტერ იუნაიტედმა" დავიდ დე ხეას შეძენის შესახებ ოფიციალური განცხადება გააკეთა და მას შემდეგ ესპანელი მეკარე მსოფლიოს ერთ-ერთი საუკეთესო კიპერად იქცა.
ამ ზაფხულს ევროპის ჩემპიონატზე დე ხეამ მადრიდის "რეალის" ყოფილი მეკარე იკერ კასილიასი ჩაანაცვლა ესპანეთის ნაკრების კარის დარაჯის პოზიციაზე და თავისი გუნდის რიგებში უდავოდ საუკეთესო იყო იტალიასთან მატჩში, რომელიც ესპანელებმა 2:0 წააგეს.
რა თქმა უნდა, საერთაშორისო დონეზე ნაჩვენები წარმატებული თამაში მხოლოდ მცირედი ნაწილია იმისა, რასაც დავიდი "იუნაიტედის" რიგებში აკეთებს, ამის დასტურად კი გამოდგება სერ მეტ ბასბის სახელობის წლის საუკეთესო ფეხბურთელის ჯილდო, რომელიც დე ხეამ ზედიზედ სამჯერ 2014, 2015 და 2016 წლებში მიიღო. მანამდე სხვა არც ერთ "წითელ ეშმაკს" არ გაუკეთებია მსგავსი რამ.
დე ხეამ მადრიდის "ატლეტიკოდან" "ოლდ ტრაფორდზე" გადასვლის შემდეგ მიცემულ პირველ ინტერვიუში განაცხადა: "ძალიან ვამაყობ და მოუთმენლად ველი აქ თამაშს.
როცა ისეთი დიდი კლუბი გიწვევს, როგორიც "მანჩესტერ იუნაიტედია", ძალიან, ძალიან ბედნიერი ხდები. მათი ინტერესი ჩემთვის დამატებითი მოტივაცია იყო უფრო მეტი შრომისა და ჩემი შესაძლებლობების დასამტკიცებლად.
დიდი პრივილეგიაა "იუნაიტედის" მსგავსი კლუბის ნაწილად ყოფნა და მსურს ჩემი მაქსიმუმი გავაკეთო, რათა ყველას ვაჩვენო, რა შემიძლია".
დე ხეას დებიუტი 2011 წელს "უემბლიზე" ქომუნითი შილდის მატჩში შედგა, რომელსაც "იუნაიტედი" მეზობელ "მანჩესტერ სიტისთან" 2-0 აგებდა, მაგრამ საბოლოოდ 3-2 მოიგო. ამის შემდეგ დავიდი პრემიერ ლიგისა (2013) და ინგლისის თასის (2016) ოქროს მედლების მფლობელიც გახდა.
25 წლის მეკარე მხოლოდ ხუთი სეზონია "ოლდ ტრაფორდზე" იმყოფება და ამ ხნის განმავლობაში მან 80-ჯერ შეინახა კარი მშრალად, რაც კლუბის ისტორიაში მეშვიდე საუკეთესო შედეგია. "იუნაიტედის" გულშემატკივარი არაერთხელ დამტკბარა მისი ზღაპრული სეივებით, რომელთა ნაწილის ხილვა ვიდეოკლიპშიც შეგიძლიათ.
დე ხეას კარიერა "იუნაიტედში" - სტატისტიკა
მატჩები
პრემიერ ლიგა - 165 ჩემპიონთა ლიგა - 27 ინგლისის თასი - 17 ლიგის თასი - 7 ევროპის ლიგა - 6 ქომუნითი შილდი - 2 ჯამში: 224