ჰენრიხ მხითარიანის "მანჩესტერ იუნაიტედში" გადასვლის თაობაზე დორტმუნდის "ბორუსიასთან" მოლაპარაკებების დროს ფეხბურთელის აგენტმა მინო რაიოლამ გაცხარებისგან კაბინეტში სკამი ძირს დაანარცხა.

რაიოლამ ადრე განაცხადა, რომ მისი კლიენტი "იუნაიტედში" გადასვლაზე ოცნებობს და არ სურს ხელიდან ასეთი შესაძლებლობის გაშვება. თუმცა "ბორუსია" "წითელი ეშმაკების" შეთავაზებას არ თანხმდება.

"იუნაიტედმა" მხითარიანის თაობაზე თავისი შეთავაზება 28 მლნ. ფუნტამდე გაზარდა და ამის ფონზე რაიოლა დორტმუნდული კლუბის ხელმძღვანელობასთან მოლაპარაკებებს აწარმოებს, მაგრამ მხარეები ჯერ ვერ შეთანხმდნენ.

გერმანული გამოცემა Bild-ი იტყობინება, რომ მოლაპარაკებების დროს დაძაბულობამ უკიდურეს დონეს მიაღწია და იმედგაცრუებულმა რაიოლამ სკამი ძირს დაანარცხა. ამავე გამოცემის თანახმად, რაიოლას უკმაყოფილება იმით არის გამოწვეული, რომ "ბორუსია" არ ასრულებს პირობას, რომლის მიხედვითაც 27 წლის ფეხბურთელი სარფიანი წინადადების მიღების შემთხვევაში გუნდიდან უნდა გაეშვა.

"ჰენრიხი - არ არის ადამიანი, რომელიც კონფლიქტზე მიდის, ეს საქმე მე მომანდო. არ დავნებდებით", - მოლაპარაკებების დასრულების შემდეგ განაცხადა რაიოლამ.