"მანჩესტერ იუნაიტედის" მთავარი მწვრთნელის ლუი ვან გაალის მომავალი "მანჩესტერ იუნაიტედში" იმდენად გასაიდუმლოებულია, რომ ხელმძღვანელობაში შემავალი პირებისთვის კი უცნობია, რა გადაწყვეტილებას მიიღებს კლუბი.

"იუნაიტედი" ჯერ კიდევ ვერ წყვეტს, როგორ მოიქცეს ლუი ვან გაალის სამწვრთნელო საქმიანობასთან დაკავშირებით. ჰოლანდიელის კონტრაქტი მომდევნო სეზონში იწურება და მის ნაადრევად გაწყვეტასა თუ უკანასკნელი შანსის მიცემას კლუბი მხოლოდ "კრისტალ პალასთან" ფინალური მატჩის შემდეგ გადაწყვეტს.

Manchester Evening News-ი ამტკიცებს, რომ გუნდის მოთამაშეები, კლუბის ხელმძღვანელობა და ისეთი პირებიც კი, როგორებიც სერ ალექს ფერგიუსონი, სერ ბობი ჩარლტონი და დევიდ გილი არიან, ვან გაალის ბედთან დაკავშირებით გაურკვევლობაში იმყოფებიან.

მხოლოდ აღმასრულებელ დირექტორ ედ ვუდვორდსა და "იუნაიტედის" მფლობელთა ოჯახს, გლეიზერებს შეუძლიათ ამ საკითხის გადაწყვეტა, მაგრამ სხვა პირებს არავითარ მინიშნებას არ უკეთებენ.

წყარო ასევე იმასაც იტყობინება, რომ "ოლდ ტრაფორდის" მკვიდრთა რიგებში გამძაფრებულია შეგრძნება იმისა, რომ კლუბს ცვლილებები ესაჭიროება. მოახდენს თუ არა ეს გავლენას გლეიზერების გადაწყვეტილებაზე, მალე გახდება ცნობილი.

წყარო: M.E.N.