"ვესტ ბრომვიჩის" მეკარე ანდერს ლინდეგაარდი შესაძლოა ინგლისის საფეხბურთო ასოციაციამ "მანჩესტერ იუნაიტედის" კაპიტნისთვის გაცემული პროვოკაციული პასუხის გამო დასაჯოს.

მცირე ხნის წინ ჟურნალ Sport-ისთვის მიცემული ინტერვიუს დროს რუნის ჰკითხეს, ყველაზე ნაკლებად რომელ თანაგუნდელთან ერთად დარჩენას ისურვებდა ცალკე. რუნიმ ლინდეგაარდი დაასახელა და ახსნა: "ის უბრალოდ მაღიზიანებს".

ლინდეგაარდმა, რომელმაც "წითელი ეშმაკების" რიგებში 19 მატჩი ჩაატარა "ოლდ ტრაფორდზე" გატარებული 4 წლის განმავლობაში, პასუხი არ დააყოვნა.

დანიელმა ინსტაგრამზე გამოაქვეყნა "იუნაიტედსა" და "არსენალს" შორის შემდგარი მატჩის ფოტო, რომელიც 2012 წლის იანვარში არის გადაღებული და მასზე რუნი ანდერს ლინდეგაარდსა და "არსენალის" ნახევარმცველს აარონ რემსის შორის საკმაოდ კურიოზულ პოზაში არის აღბეჭდილი.



"იქნებ, ამის გამო არ გინდა ჩემთან ერთად ლიფტში გაჭედვა, ბიჭო?" - დაწერა ლინდეგაარდმა და შეურაცხმყოფელი თეგი დაურთო.

ამ ინციდენტს ასოციაცია გამოიკვლევს, რომელიც სოციალურ ქსელებში ფეხბურთელთა კონტაქტს თვალს ადევნებს.