ასეთი ორი ძალიან კარგი თამაშის შემდეგ, ალბათ არც ერთი გუნდის მთავარ მწვრთნელს და მათ შორის არც ვან გაალს არ მოუნდებოდა დაცვის ხაზში კორექტივების შეტანა, თუმცა ჩვენდა სამწუხაროდ ლუის ამის გაკეთება მოუწევს. მოუწევს იმიტომ, რომ სანაკრებო შესვენების დროს, იტალიასა და ინგლისს შორის გამართულ ამხანაგურ შეხვედრაში კრის სმოლინგი დაშავდა და როგორც პირველადი დაკვირვებებით გახდა ცნობილი იგი ვერ შეძლებს ხვალ გასამართ შეხვედრაში მონაწილეობის მიღებს. სმოლინგი ძალიან კარგ ფორმაში შევიდა და გუნდის ერთ-ერთ წამყვან მოთამაშედაც იქცა, მისი შეცვლა ადვილი არ იქნება, მაგრამ მჯერა მარკოს როხო შესანიშნავად გაართმებს საქმეს თავს. 4-ეულის სხვა წევრები ჯანმრთელები და ჯან-ღონით სავსენი არიან, ამიტომ თამაშში ხელს ვერავინ შეუშლის.





ნახევარდაცვის ხაზში სიტუაცია ცოტა სხვანაირადაა, არიან მოთამაშეები, რომლებიც შესვენების დროს უსაქმოდ დარჩნენ და უთამაშებლები არიან, თუმცა კარგ ფორმაში იმყოფებოდნენ, მაგალითად: ხუან მატა და ანდერ ერერა. ასევე უთამაშებელია ეშლი იანგიც, რომელმაც "ლივერპულთან" შეხვედრა მაღალ დონეზე ნამდვილად ვერ ჩაატარა, პლუს ამას მცირე დაზიანებაც მიიღო, რის გამოც მის ნაცვლად დი მარია შემოვიდა. ამიტომ ვფიქრობ იანგის ნაცვლად ანხელის დაყენება გამართლებული უნდა იყოს, თანაც დი მარიამ ორივე მატჩი ჩაატარა ნაკრებში და არც თუ ურიგოდ. კერიკი და ფელაინის განხილვა, მგონი არც ღირს. პირველი მათგანი გუნდის ერთ-ერთი ლიდერია, სწორედ მის დაბრუნებას უკავშირდება გუნდის ათამაშება, ხოლო მარუანი უბრალოდ შეუჩერებელი გახდა, მას ბოლო 4 შეხვედრაში (კლუბი+ნაკრები) 4 გოლი მოუგროვდა, რაც ნახევარმცველისთვის საუცხოო შედეგია.





ვფიქრობ, ამ ეტაპზე კაპიტანი უკონკურენტოა და საერთოდაც, მას შემდეგ რაც უეინი შეტევაში დაბრუნდა ყველა ვხედავთ, რომ ბევრად პროდუქტიულია. პირადად მე, ვერაფრით დავეთანხმები მის ნახევარდაცვაში დაბრუნებას - ეს მხოლოდ რობინ ვან პერსისთვის თუ იქნება სარგებლის მომტანი, თორემ არამგონია სხვამ ამით იხეიროს.

სრული შემადგენლობა: დე ხეა, ვალენსია, ჯონსი, როხო, ბლინდი, კერიკი, ერერა, მატა, ფელაინი, დი მარია, რუნი.

ეთანხმებით თუ არა ავტორს?

დიახ

არა

ნაწილობრივ

ხმის მიცემა შედეგები