ლაშა ვეკუა



სამწუხაროდ 5 წუთით განწყობა უნდა გაგიფუჭოთ და ჩემი, ცოტა არ იყოს არაორდინალური ფიქრები გაგიმხილოთ. ყველა თუ არა, გულშემატკივართა უმრავლესობა დარწმუნებულია, რომ ლუი 4-4-2 ტაქტიკით გააგრძელებს თამაშს, თუმცა მე ამ კატეგორიას არ მივეკუთვნები და ვეცდები აგიხსნათ თუ რატომ ვფიქრობ ასე.

სწორედ ასეთ დროს, როცა არავინ არ ელის, ლუი იღებს გადაწყვეტილებას, რომელიც ყველას აოცებს (გაიხსენეთ "არსენათან" შეხვედრა), მას უყვარს სიურპრიზები. ჰოლანდიელმა რამდენიმე დღის წინ პრეს-კონფერენციაზე განაცხადა,რომ ის ფეხბურთელებს არგებს ტაქტიკას და არა პირიქით. იანგის და კერიკის ტრავმის შემდეგ, "იუნაიტედი" დარჩა მარცხენა ვინგ-ბექის გარეშე და სწორედ ამიტომ გადაეწყო გუნდი 4-მცველზე, ახლა კი როცა ეშლი მწყობრშია და მზად არის მარცხენა ფლანგი კვლავ ჩაიბაროს, ვფიქრობ ისევ 3-5-2 ტაქტიკას ვიხილავთ.

დაცვის ხაზში შემდეგ ტრიოს გავამწესებ: ჯონსი-სმოლინგი-როხო. შესაძლოა ჯონსის შუაში ყოფნა ზოგადად უკეთესი იყოს, თუმცა არა "ვესტ ჰემთან" მატჩში, რომელსაც ერთ ფლანგზე კრესუელი, დაუნინგი და ენერ ვალენსია ჰყავს, ამიტომ დაცვის მარჯვენა ფლანგის გამაგრება აუცილებელი იქნება.

"ჩაქუჩებს" მოედნის ცენტრშიც ძალიან ძლიერი და კარგი ფეხბურთელები ჰყავთ, როლებსაც ასევე კარგი ოპონენტები სჭირდებათ. ვფიქრობ ბლინდი-რუნი დღევანდელ "იუნაიტედში" სწორედ ის წყვილია, რომელიც შეძლებს მეტოქის შეჩერებას. ფლანგებს ეშლი იანგი და ანტონიო ვალენსია ჩაიბარებენ და იმედი მაქვს ამ ამოცანას თავს კარგად გაართმევენ.

ოთხეულის წინ, 10-იანის პოზიციაზე ანხელ დი მარიას ვხედავ, რომელიც ბოლო თამაშებია საკუთარ თამაშს პოულობს და სავარაუდოდ სულ მალე დაიბრუნებს ჩვეულ ფორმას.

ლონდონური გუნდი ტანმაღალი მოთამაშეებით არის დაკომპლექტებული და "კემბრიჯის" მსგავსად უმეტესად ჩაწოდებებს მიმართავს, სწორედ ამიტომ ფელაინის ყოფნამ გუნდზე დადებითად უნდა იმოქმედოს, თანაც მან წინა შეხვედრაში ამ პოზიციაზე თავი ძალიან კარგად წარმოაჩინა. ბელგიელს კი რობინ ვან პერსი შეუწყვილდება, რომელიც კლასის და გამოცდილების ხარჯზე ეცდება მცველების "დაჩაგვრას".

გიორგი გოგია



ბოლო რამოდენიმე მატჩი "იუნაიტედმა" წარმატებით დაასრულა. ვფიქრობ "ვესტ ჰემის" წინააღმდეგ მატჩში "მანჩესტერ იუნაიტედი" აღნიშნული შემადგენლობით გამოვა:

ორი აზრი არ არსებობს იმაზე, რომ ვან გაალი კარის დარაჯად, როგორც ყოველთვის ახალგაზრდა ესპანელ დავიდ დე ხეას აირჩევს. რაც შეეხება დაცვის ხაზს, დიდი ალბათობით "ჩაქუჩებთან" მატჩში "იუნაიტედი" დაცვის ამ ოთხეულით გამოვა: შოუ-როხო-ჯონსი-ვალენსია. ბოლო რამოდენიმე უმაღლეს დონეზე ჩატარებული მატჩის შემდეგ, დაცვაში არგენტინელ მარკოს როხოს ვიხილავთ, ხოლო მას გვერდს ჩემი აზრით ახალგაზრდები, ლუკ შოუ და ფილ ჯონსი "დაუმშვენებენ". მარჯვენა ფლანგს, მწვრთნელი ალბათ, "ლესტერთან" თამაშის მსგავსად კვლავ ანტონიო ვალენსიას ანდობს, მიუხედავად იმისა, რომ მისი ადგილი ბოლო მატჩში პედი მაკნეირს ეჭირა.

საკვირაო შეხვედრაში ჰოლანდიელი მენტორი დიდი ალბათობით დაიმონდს შემოგვთავაზებს. ვფიქრობ, პირველივე წუთებიდან თამაშს, მაღალ დონეზე ჩატარებული მატჩების შემდეგ ბლინდი დაიწყებს. მონაწილეობას ასევე გუნდის კაპიტანი უეინ რუნიც მიიღებს, რომელსაც ანხელ დი მარია შეუწყვილდება, ხოლო 10-იანის პოზიციას კი ხუან მატა დაიკავებს.

რაც შეეხება თავდასხმელთა დუეტს, ჩემი აზრით პრემიერ ლიგის 24-ე ტურის მატჩში ფალკაო-ვან პერსის დუეტი გამოვა.

ბუკა ობოლაძე



იმედი მაქვს,რომ ვან გაალი ისევ 4–4–2 ტაქტიკით ათამაშებს გუნდს.

კარში, რა რა თქმა უნდა, დე ხეა, წელს იმედია ვალდესი გამოჩნდება მოედანზე, თუმცა მგონია რომ რომელიმე მატჩში სათადარიგოთა სკამიდან შემოვა.

დაცვას რაც შეეხება, მარჯვნივ მგონია,რომ ვალენსია დადგება, მისი სისწრაფე კონტრშეტევებზე გამოგვადგება, ამასთან ერთად, ბოლო თამაშებში საკმაოდ სტაბილური გახდა და თითქმის არ უშვებს შეცდომებს. დაცვის ცენტრში როხო და სმოლინგი შეწყვილდებიან, ხოლო მარცხნივ შოუ.

ნახევარდაცვაში ძალიან საინტერესო იქნება ფიზიკურად ძლიერი დუეტის ხილვა, ფელაინი როდესაც არის მოედანზე ფიზიკურ ბრძოლებს თითქმის არ ვაგებთ, შეტევაშიც კარგად ირჯება და თუ მას ფიზიკურად ძლიერ ჯონსს დავუწყვილებთ ცენტრს დავისაკუთრებთ.

ფლანგებიდან დი მარიამ და იანუზაიმ უნდა შეუტიონ, "კემბრიჯთან" პირველ თამაშში ძალიან კარგად გამოიყურებოდა ორივე და ვფიქრობ, რომ ასეთი სისწრაფის და ტექნიკის მქონე ფეხბურთელები ერთად უნდა დააყენოს ლუიმ.

უეინ რუნი,რომელსაც ყველა პოზიციაზე ათამაშებენ, ჩემი აზრით ვერც ამ მატჩში მოხვდება თავის საყვარელ პოზიციაზე. კაპიტანი ათიანზე ითამაშებს და, რა თქმა უნდა, უკან დაიწევს ძლიერი დუეტის დასახმარებლადაც.

თავდასხმაში ალბათ მაინც ვან პერსის დააყენებს ვან გაალი, ბოლო დროს შედარებით ათამაშდა რობინი და იმედია გაიტანს.

რომელ ავტორს ეთანხმებით?

ლაშა ვეკუას

გიორგი გოგიას

ბუკა ობოლაძეს

არცერთს

ხმის მიცემა შედეგები