"მანჩესტერ იუნაიტედის" ყოფილი მწვრთნელი, ტომი დოჰერტი თვლის, რომ ლუი ვან გაალის გუნდს პრემიერ ლიგის 4 საუკეთესო გუნდს შორის მოხვედრის არავითარი შანსი არ აქვს.
შოტლანდიელი სპეციალისტი, რომელიც "იუნაიტედს" 1972 წლიდან 1977 წლამდე ხელმძღვანელობდა თვლის, რომ მიუხედავად ბრწყინვალე რეზიუმისა, რომელიც ვან გაალს აქვს, იგი "იუნაიტედს" მიმდინარე სეზონში ჩემპიონთა ლიგაზე ვერ გაიყვანს.
"ვან გაალი აქ მოსვლისას ალბათ ტიტულზე ოცნებობდა, მაგრამ ოცნება პირველ კვირებში გაუფერულდა. სიმართლე გითხრათ, არც ერთ პენის არ დავდებდი ოთხეულში მათ შესვლაზე. მანამ, სანამ ისინი საკუთარ გეგმებში გაერკვევიან, ჩემპიონთა ლიგაზე მოხვედრის საუკეთესო საშუალება მათთვის ლა-მანშის გადაცურვა იქნება."
"რა თქმა უნდა, ვან გაალს კონტინენტზე შესანიშნავი წარმატებებისთვის აქვს მიღწეული, მაგრამ შესაძლოა არ ელოდა, რომ პრემიერ ლიგაში სხვაგვარ ფეხბურთს თამაშობენ."
"დევიდ მოიესს ძალიან მკაცრად მოექცნენ და მიმდინარე სეზონი ამას ამტკციებს. ვან გაალმა მთელი რესურსი ტრანსფერებზე დახარჯა და ამის ფონზე მას გასულ წელთან შედარებით უარესი მაჩვენებელი აქვს, თუმცა მას თავზე არავინ დასჩხავის."
"ტრავმები მას არ ინდობს, მაგრამ ვშიშობ ვან გაალს ფული უფრო მალე შემოელევა, ვიდრე ფეხბურთელები, თუ ზამთარში ისევ დახარჯავს. მან ძალიან მოკლე პერიოდში ძალიან ბევრი ცვლილება განახორციელა. რა თქმა უნდა, მას შეუძლია ტრავმებზე იწუწუნოს, მაგრამ ძვირადღირებული შენაძენები სრულფასოვანი პროდუქტი უნდა იყოს და არა ის, რასაც ახლა ვხედავთ."
"ანხელ დი მარია პრემიერ ლიგის საუკეთესო ფეხბურთელი უნდა გამხდარიყო, მაგრამ კოჭლივით მოქმედებს. რაც შეეხება ფალკაოს, ვგონებ, ის სპორტულ ვიქტორინაშიც კი მიიღებდა ტრავმას."
"ლუკ შოუ - ახალგაზრდაა, ნაკრების ფეხბურთელია, მაგრამ მის შესახებ დასკვნების კეთება ჯერ ნაადრევია. ვფიქრობ, ის ჯერ კიდევ ეძებს საკუთარ თამაშს, თუმცა უკეთესად გამოიყურება, ვიდრე "საუთჰემპტონში" - განაცხადა დოჰერტიმ.