"მანჩესტერ იუნაიტედის" ყოფილი მწვრთნელი, სერ ალექს ფერგიუსონი მიიჩნევს, რომ "ოლდ ტრაფორდზე" შინჯი კაგავას პერსპექტივებს ხუან მატას მოსვლამ გადაუსვა ხაზი.
მიმდინარე წლის იანვარში "იუნაიტედმა" თავისი სარეკორდო შენაძენი განახორციელა და ხუან მატა 37 მლნ. ფუნტად შეიძინა. მზარდმა კონკურენციამ კაგავას "დორტმუნდში" დაბრუნებისკენ უბიძგა, სადაც ფერგიუსონის აზრით იაპონელი ჩვეულ ფორმას აღიდგენს.
"მე ძალიან კმაყოფილი ვიყავი შინჯით. ის კარგად შეგვეგუა და მიმაჩნდა, რომ თავს კომფორტულად გრძნობდა."
"თითოეულ მწვრთნელს საკუთარი ფილოსოფია გააჩნია. როცა მოიესმა ხუან მატა გადაიბირა, კაგავა მიხვდა, რომ ის აღარ იქნებოდა უპირველესი არჩევანი და იმედი დაკარგა."
"მჯერა, რომ "ბორუსიამ" და კაგავამ სწორი არჩევანი გააკეთეს. შინჯი იქ ისე იგრძნობს თავს, როგორც თევზი წყალში. კლოპი კი ის მწვრთნელია, რომელიც მას აუცილებელ თავდაჯერებულობას შესძენს." - განაცხადა სერ ალექსმა.