"მანჩესტერ იუნაიტედის" ცენტრალური მცველი, კრის სმოლინგი აცხადებს, რომ "ოლდ ტრაფორდზე" ფეხის დადგმა დიდი სიამოვნებაა მისთვის და მატჩს მოუთმენლად ელოდება.
"წითლები" "ოლდ ტრაფორდზე" "სუონსის" ხვდებიან, რითიც პრემიერ-ლიგის ჩემპიონატს დაიწყებენ და ეს ამავდროულად ლუი ვან გაალის სადებიუტო შეხვედრაც იქნება.
ფეხბურთელები "ოლდ ტრაფორდს" წარმატებით დაუბრუნდნენ სამშაბათს, "ვალენსიასთან" შეხვედრაში, მაგრამ სმოლინგის აზრით პირველი შეხვედრა მაინც განსაკუთრებულია.
"ოლდ ტრაფორდზე" ფეხის დადგმა ყოველთვის განსაკუთრებული მოვლენაა. იქ "ვალენსიასთან" ამხანაგური შეხვედრა გვქონდა, მაგრამ ყოველთვის სასიამოვნოა სეზონის პირველი ოფიციალური შეხვედრის გამართვა, რომელშიც საშუალება გვეძლევა, რომ გულშემატკივრებს ჩვენი ნამუშევარი ვაჩვენოთ და სეზონი კარგ ნოტაზე დავიწყოთ."
"ფრთები გესხმება, როცა გვირაბში დგები და შეხვედრას ელოდები, მაგრამ ამას უფრო მეტად გრძნობ, როცა ლიგის პირველ შეხვედრას მართავ, ეს კი გეხმარება, რომ შემართება მოიკრიბო. ყველამ ვიცით რაც უნდა გავაკეთოთ იქ, როცა გავალთ და იმედი გვაქვს, რომ საფინალო სასტვენის შემდეგ ჩვენ დავრჩებით გამარჯვებულები." - განაცხადა კრის სმოლინგმა.