იტალიური Sky Sports-ის ჟურნალისტი, ჯანლუკა დი მარციო, რომელსაც ერთ-ერთ ყველაზე სანდო წყაროს უწოდებენ სატრანსფერო ახალი ამბების გავრცელებაში, აცხადებს, რომ "მანჩესტერ იუნაიტედმა" და პოლ პოგბამ პრინციპულ შეთანხმებას მიაღწიეს. ამავე ინფორმაციას ადასტურებს კიდევ ერთი ცნობილი ჟურნალისტი ტანკრედი პალმერი.

დი მარციო ამტკიცებს, რომ მხარეებმა კონტრაქტის პირობები უკვე შეათანხმეს, რის საფუძველზეც "იუნაიტედის" აღზრდილი, რომელმაც კლუბი 2012 წელს თავისუფალი აგენტის სტატუსით დატოვა, წელიწადში 11 მილიონ ფუნტს მიიღებს ხელფასის სახით.

მიმდინარე ევროპის ჩემპიონატის დასრულების შემდეგ პოგბას აგენტი მინო რაიოლა "იუვენტუსს" "მანჩესტერ იუნაიტედის" მხრიდან რეკორდულ შეთავაზებას გაუკეთებს.

ცნობილია, რომ რაიოლა და ედ ვუდვორდი მიმდინარე კვირას მონაკოში შეხვდნენ ერთმანეთს.

წყარო: gianlucadimarzio.com