"მანჩესტერ იუნაიტედის" მთავარი მწვრთნელი, ლუი ვან გაალი აცხადებს, რომ გუნდის შემადგენლობით მაქსიმალურ შედეგს მიაღწია, რამეთუ მის განკარგულებაში არ არიან ფეხბურთელები, რომლებიც მოთხოვნად დონეს აკმაყოფილებენ.

"წითლები" პრემიერ ლიგაში მეხუთე ადგილზე იმყოფებიან და ერთადერთი ტურნირი, რომლის მოგებაც მიმდინარე სეზონში შეუძლიათ, ინგლისის თასია, სადაც ფინალში გავიდნენ.

თუმცა ვან გაალი არაერთხელ გამხდარა კრიტიკის ობიექტი, რასაც თავად იმით პასუხობს, რომ გუნდში სწრაფი და კრეატიული ფეხბურთელები სჭირდება.

"ყველაფერი ადრეც ვთქვი. სატრანსფერო პერიოდშიც განვაცხადე. ეს ჩემი თავსატეხია, რადგანაც უნდა ვმართო ფეხბურთელები, რომელთა დონეც ყოველთვის ისეთი არ არის, როგორიც მინდა.

მაგრამ ჩვენ მაინც აქ ვართ, მაინც ვიბრძვით მეოთხე ადგილისთვის, ინგლისის თასის ფინალშიც გავედით.

სამ ტურნირზე ვითამაშეთ, ვფიქრობ, ჩვენ ყველაზე მეტი მატჩი ჩავატარეთ ამ სეზონში. ეს კი მცირე შემადგენლობითა და 14 ტრავმით გავაკეთეთ.

როცა ყველა ჯანმრთელი იყო, მაშინაც ამას ვამბობდი. იმ დროს ჩემპიონატში პირველ ადგილს ვიკავებდით. მერე კი 14 ტრავმირებული ფეხბურთელი გვყავდა, მცველების პოზიციაზე კი ორმაგი ტრავმები, პრობლემას ვერ ვუმკლავდებოდი", - განაცხადა ვან გაალმა.

წყარო: goal.com