"მანჩესტერ იუნაიტედის" თავკაცი, დევიდ მოიესი აცხადებს, რომ მიმდინარე სეზონში ჩატარებული რამდენიმე შეხვედრის გამო მას სირცხვილი სწვავს.
მხოლოდ პრემიერ-ლიგის ეგიდით რომ ავიღოთ, მოიესის ხელმძღვანელობის ქვეშ "იუნაიტედმა" უკვე მოასწრო "სიტისტან", "ჩელსისთან", "ვესტ ბრომვიჩთან", "ნიუკასლთან", "სტოკთან"," "ევერტონთან", "ტოტენჰემთან" და ორჯერ "ლივერპულთან" დამარცხება. თანაც ამ მატჩების უმეტესობა "ოლდ ტრაფორდზე" დათმეს.
"იუნაიტედმა" ფაქტიურად დაკარგა ჩემპიონთა ლიგის ზონაში შესვლის შანსი, მაგრამ "ოლიმპიაკოსთან" მოპოვებული დამაჯერებელი გამარჯვება მოიესს ოპტიმიზმს უსახავს. (რომელიც ისედაც არ აკლდა - ავტორი)
"ვფიქრობ ძალიან მნიშვნელოვანი იყო, რომ ოთხშაბათს გულშემატკივართათვის თვალებში შემეხედა. ვფიქრობ მათ რაღაც მიზეზი მაინც მივეცით სიხარულისთვის და ჩვენი თამაში სულაც არ იყო სამარცხვინო."
"სხვა თამაშებში მრცხვენოდა, რადგან გუნდი არასაკმარისად კარგად თამაშობდა და ვერ აღწევდა იმ შედეგს, რომელიც საჭირო იყო."
"ჩვენი სათამაშო ფორმა და თამაშებიც არასაკმარისად სტაბილური იყო. ყველაფერი ნათელია, უკეთესად უნდა ავთამაშდეთ. ამას კი დრო სჭირდება, არ შეიძლება უცებ ათამაშდე ყველა შეხვედრაში" - ციტირებს მოიესის სიტყვებს Daily Mail.