კაცი, რომელიც გუშინ ვილმსლოვის ბარში იჯდა და Telegraph-ის კორესპონდენტს "მანჩესტერში" გატარებულ დროზე ესაუბრებოდა, მოიესის გადაწყვეტილების გამო გულნატკენი ჩანდა. "მას ვუთხარი: 'დევიდ, მიუხედავად დიდი პატივისცემისა, შენ "ევერტონში" მუშაობის პერიოდში პრემიერ ლიგაში საოცარი სამუშაო შეასრულე, მაგრამ ხვდები რომ იახტიდან უზარმაზარ გემზე გიწევს გადასვლა?' ფერგიუსონს, სამწვრთნელო შტაბის კაპიტანს, ბევრი კარგი დამხმარე ჰყავდა.
მივხვდი, რომ დევიდს ნაცნობი სახეები სჭირდებოდა, რომლებთანაც მას უფლებები ექნებოდა, მაგრამ არანაირი პრობლემა არ იქნებოდა თუ იტყოდა: 'მე აუცილებლად მჭირდება ჯიმი ლამსდინი შტაბში მაგრამ მოიცადე, ერთი წუთით, ეს უზარმაზარი გემი ამ 'ეკიპაჟის' წყალობით ბოლო ხუთი წელია წარმატებულად დაცურავს და ჯობია, ერთი სეზონი მათთან ერთად ვიცურო და ვნახო რა გამოვა.'

"კლუბის დატოვებამ ნამდვილად დამამწუხრა." - გააგრძელა მალესტინმა. "მე აქ მსოფლიოში საუკეთესო სამსახური მქონდა. მიყვარდა საუკეთესო ფეხბურთელებთან მუშაობის ყველა მომენტი, მე ვიცნობდი გუნდს კლუბშიც და კლუბის გარეთაც.
იუნაიტედის" სხვადასხვა დეპარტამენტს 12 წელი ვაჩუქე: აკადემიაში, რეზერვებში, მთავარი გუნდის ტექნიკური პირადი მწვრთნელი და ბოლოს მთავარი გუნდის მწვრთნელის დამხმარე. ბოლო 5 წელიწადი ჩემთვის განსაკუთრებული იყო. ყოველდღე ვიზრდებოდი, ყოველკვირა, ყოველთვე, ყოველი გამარჯვების და დამარცხების შემდეგ.

"მწვრთნელი დელეგატად მაგზავნიდა. ის მე მენდობოდა. ვიმედოვნებ, რომ კვლავ მივიღებ ისეთ გამოწვევას, როგორიც "მანჩესტერში" მქონდა და კვლავ ვიმუშავებ ისეთ ადამიანთან, რომელსაც ჩემს მიმართ იმხელა რწმენა და ნდობა ექნება, როგორც სერ ალექსს ჰქონდა წლების განმავლობაში.

ჩემი სახელი 21 წლამდელებს დაუკავშირეს, მაგრამ ინგლისის ასოციაციასთან ერთხელაც არ მისაუბრია. როგორ შეუძლიათ მათ აარჩიონ კანდიდატები, როცა სხვებს საერთოდ არ უსმენენ? მეგობარმა მითხრა: '21 წლამდელებისთვის შენ შესანიშნავი კანდიდატი ხარ'. მე ვუპასუხე: 'დამიჯერე, ისინი უცხოელს მწვრთნელად არ დანიშნავენ.' მაგრამ 12 წელია რაც ამ ქვეყანაში ვარ, აქ უფრო მეტ შესანიშნავ ახალგაზრდასთან მიმუშავია, ვიდრე ჰოლანდიაში: უელბეკი, ქლევერლი, ლარნელ კოული, ჯესი ლინგარდი. და მე თქვენ გეტყვით, რომ ამ საკითხთან დაკავშირებით ინგლისში არაფერი შეიცვლება."

მალესტინმა "ბარსელონასთან" დაპირისპირებები გაიხსენა.
"რომში, 2009 წელს, ვერ გამოვიყენეთ ის სივრცე, რაც გვქონდა. ჩვენ გვყავდა პოლ სქოულზი, მსოფლიოში ერთ-ერთი საუკეთესო ნახევარმცველი სათადარიგოთა სკამზე. "ბარსელონასთა" საჭიროა ფეხბურთელი, რომელიც ბურთს შეინარჩუნებს.
"უემბლიზე" (ორი წლის შემდეგ) ჩვენი მომზადების დონე ბრწყინვალე იყო, მაგრამ პირველი ტაიმი ისე ვერ გამოვიყენეთ, როგორც ამას მთელი კვირის განმავლობაში ვგეგმავდით. შეხედეთ მეორე ტაიმის პირველ თხუთმეტ წუთს, "ბარსელონა" ამ დროს მოწინააღმდეგის გუნდის მოკვლას ცდილობს. ამის გაკეთება ჩვენთანაც გამოუვიდათ, მეორე ტაიმი ისე არ დავიწყეთ, როგორც უნდა დაგვეწყო. ფეხბურთელებს დაავიწყდათ მთელი კვირა რას ველაპარაკებოდით."

რენეს იმ მიზეზებზეც ჰკითხეს, რომლის გამოც უეინმა "რეალთან", სეზონის ერთ-ერთი ყველაზე მნიშვნელოვანი დაპირისპირება გამოტოვა. ამ მატჩში რუნის მაგივრად უელბეკმა ითამაშა, რომელსაც ხაბი ალონსოს განეიტრალება ევალა.
"მწვრთნელმა ამ დღემდე უეინს ბევრჯერ შესთავაზა მსგავსი როლის შესრულება, ხანდახან რუნის ეს ძალიან კარგად გამოსდიოდა, ხანდახან არა. ამჯერად დიდი მატჩი გველოდა. ხანდახან ვამჩნევდით და ვხვდებოდით, რომ თუ უეინს პირველი წუთიდანვე ვათამაშებდით, ის დასაწყისში დიდ ენერგიას დახარჯავდა და შეხვედრის მიწურულს სასურველ დონეზე ვეღარ ითამაშებდა. ახლა მსგავსი მომენტი იყო, ალონსოს წინ და უკან დევნა დიდ ენერგიას მოითხოვდა.

რა თქმა უნდა, უეინს შესანიშნავად შეუძლია რობინთან შეწყობა. გაიხსენეთ პასი "ასტონ ვილასთან" მატჩში, ეს ყველაფერს ამტკიცებს. წლებია, რაც რუნი "იუნაიტედისთვის" ჩინებული მოთამაშეა მაგრამ თუ გინდათ, რომ საუკეთესო ფორმაში უეინი ნახოთ, უნდა შეიყვანოთ მოედანზე და გაიყვანოთ შესაბამის დროს, რომ იხილოთ სტაბილური უეინ რუნი. 2009 წელს, როცა "არსენალი" ჩემპიონთა ლიგის ნახევარფინალიდან გამოვთიშეთ, უეინი საუკეთესო ფორმაში იყო, რაც ოდესმე მინახავს: ძლიერი, სავსე მონდომებით და გამბედაობით. ის შეუჩერებელი იყო.

"და ვიფიქრეთ: ვათამაშოთ უელბეკი ძირითადში და შემდეგ შემოვიყვანოთ რუნი. მეორე ტაიმში უკვე მწვრთნელს ვეუბნებოდი 'რუნის შემოსაყვანად კარგი დროა', როცა სულელური ინციდენტი მოხდა. წითელი ბარათი ნანისთვის სასაცილო იყო, სერ ალექსი მეოთხე დამხმარე მსაჯისკენ გაიქცა. იცოდა, ეს მისი ბოლო სეზონი იყო. ვიჯექი და ვფიქრობდი: 'ერთი წუთით, ბარათი უკვე ნაჩვენებია, როგორ უნდა გავუმკლავდეთ ამას?' ვაპირებდით დაცვითი ხაზი გაგვეძლიერებინა როცა მოურინიომ მოდრიჩი იხმო."

"ანჟიში" გატარებულ მცირე დროში მალესტინმა "იუნაიტედის" დახმარება სცადა.
"კლუბში კარგი ფეხბურთელები თამაშობდნენ, მათგან ერთ-ერთი გამორჩეული ვილიანი იყო. ფეხბურთელი, რომელსაც თამაშში სიახლის შემოტანა შეუძლია და ფეხბურთელი, რომლის საყურებლადაც მაყურებელი სტადიონზე დადის. "იუნაიტედს" ამ ვილიანით დაინტერესება ვურჩიე. "დააკვირდით ამ ფეხბურთელს" ვუთხარი მათ. ტოპ კლასის კლუბს ყოველთვის სჭირდება გუნდის განახლება, როგორც ეს წინა წელს ვან პერსის შეძენის შემთხვევაში მოხდა.
"იუნაიტედში" ასეთი ფეხბურთელების ნაკლებობაა. ფეხბურთელების, რომლებსაც თამაშში სხვა მოთამაშეების ჩართვა ეხერხებათ. ვან პერსი რომ არ გადმოსულიყო, პრემიერ ლიგას კლუბი ვერ მოიგებდა." - ვან პერსიც ის ერთ-ერთი ფეხბურთელია, რომელსაც მსოფლიოს ალბათ ერთ-ერთი საუკეთესო მწვრთნელი ეხმარებოდა რენე მალესტინის სახით.

წყარო: The Telegraph