"ეშმაკების" ნახევარმცველი პოლ სქოულზი ამ სეზონის ბოლოს საფეხბურთო კარიერას დაასრულებს, - იტყობინება "მანჩესტერ იუნაიტედის" ოფიციალური საიტი.

38 წლის ნახევარმცველმა ადრე უკვე დაასრულა კარიერა, თუმცა შემდეგ მიიღო გადაწყვეტილება და თავის გუნდს კიდევ ერთხელ დაუბრუნდა. სქოულზმა "მანჩესტერ იუნაიტედის" მაისურით 716 მატჩი ჩაატარა.

"პოლი მუდამ გამორჩეული მოთამაშე იყო! მან ყველაფერი მიუძღვნა ჩვენს გუნდს და ჩემთვის დიდი პატივია მემუშავა ისეთ მოთამაშესთან, როგორიც პოლ სქოულზია. პოლი "სუონსთან" მატჩში მიიღებს მონაწილეობას, რის შემდეგაც თავის 11-ე საჩემპიონო ტიტულს აიღებს".-განაცხადა სერ ალექსმა.

"დიახ, მე საბოლოოდ ჩამოვკიდებ ბუცებს. ყველაფერი, რაც ჩემს ცხოვრებაში მინდოდა მეკეთებინა - ეს იყო ფეხბურთი. ბედნიერი ვარ, რომ ასეთი წარმატებული კარიერა მქონდა "მანჩესტერ იუნაიტედში". ვხედავ, რომ ჩვენი გუნდი დღეისთვის დაბალანსებულია და იმედი მაქვს დევიდ მოიესი "იუნაიტედს" ააყვავებს".- განაცხადა პოლმა.

წყარო: soccer.ru