"მანჩესტერ იუნაიტედის" თავკაცს, სერ ალექს ფერგიუსონს არ ჰგონია, რომ მისი გუნდი შეძლებს კარი მშრალად შეინახოს ჩემპიონთა ლიგის 1/8 ფინალურ ეტეპზე "მადრიდის რეალთან" მატჩში.
უკვე სამშაბათს "იუნაიტედი" და "რეალი" გაათამაშებენ 1/4 ფინალური ეტაპის საგზურს. პირველი შეხვედრის შემდეგ მცირე უპირატესობა წითელ ეშმაკუნებს აქვთ, რადგან მათ გასვლაზე მოახერხეს გოლის გატანა და ასევე მატჩიც მათთვის ხელსაყრელი ანგარიშით 1-1 დასრულდა.
იყო ვარაუდი, რომ "იუნაიტედი" შეეცდება კარის მშრალად შენახვას და დაცვაში თამაშს, თუმცა სერ ალექსს არ ეშინია მეტოქის და შეტევას შეტევით უპასუხებს.
"ვფიქრობ, რომ ორივე გუნდი გაიტანს. უბრალოდ ვიმედოვნებ, რომ მათზე მეტს გავიტანთ. ჩვენ მართლაც კარგ ფორმაში ვართ. ყველა ფეხბურთელს სარგებელი მოაქვს კლუბისთვის.
გუნდში ბრწყინვალე ატმოსფერო და შემართებაა, ამიტომ ძნელია ვინმეს ძირითადის გარეთ დატოვება, რადგანაც ახლა ყველა ბოლომდე იხარჯება და თავისი შესაძლებლობების მაქსიმუმს აჩვენებს." - დაასრულა ფერგიუსონმა.