"მანჩესტერ იუნაიტედის" იჯარით აყვანილი ფორვარდი ოდიონ იგალო ჯერ კიდევ არ შეერთებია თავის ახალ გუნდს და დამოუკიდებლად ვარჯიშობს, ამის მიზეზი კი გახლავთ ის ფაქტი, რომ ის ახალჩამოსულია ჩინეთიდან, სადაც კორონავირუსის ეპიდემიაა გავრცელებული.

კლუბმა ეს გადაწყვეტილება ყოველგვარი რისკის გამოსარიცხად მიიღო, მიუხედავად იმისა, რომ ამის შანსი უკიდურესად მცირე გახლდათ.

30 წლის ნიგერიელი თავდამსხმელი კლუბს ორშაბათს, ჩელსის წინააღმდეგ გასამართი მატჩისთვის შეუერთდება.

როგორც მოგეხსენებათ, "წითლები ეშმაკები" საწვრთნელ შეკრებაზე ესპანეთში იმყოფებიან. ხოლო გუნდის ახალწვეული, როგორც BBC Sport-მა შეიტყო, მანჩესტერში, ეტიჰადის სტადიონთან ახლოს, National Taekwondo Centre-ში პერსონალური პროგრამით ემზადება, რათა "ჩელსისთან" მატჩს მწყობრში შეხვდეს.

ოდიონ იგალო "იუნაიტედს" სეზონის ბოლომდე ჩინური სუპერლიგის კლუბ "შანჰაი შენჰუადან" შეუერთდა.

კორონა ვირუსმა ბოლო მონაცემებით ჩინეთში 1350 ადამიანი იმსხვერპლა, ხოლო 60 000-ზე მეტი ინფიცირებულია.

ეპიდემიის გამო გადაიდო არაერთი სპორტული ღონისძიება, მათ შორის, ფორმულა 1-ის გრან-პრი.

წყარო: BBC