ნანი ულტიმატუმის წინაშეა - გააფორმებს ახალ კონტრაქტს, ან კლუბს სეზონის ბოლოს დატოვებს.
წინა კვირას, შეხვედრაზე დაბარებულ ლუის ნანის „იუნაიტედმა“ ახალი კონტრაქტი შესთავაზა, რომლის თანახმადაც, გუნდში ის 4 წლით დარჩება და კვირაში 90,000 ფუნტ სტერლინგს მიიღებს.
მისი მოთხოვნა, ყოველკვირეულად 130,000 ფუნტი მიეღო, კლუბმა არ დააკმაყოფილა. ახლა უკვე ყველაფერი პორტუგალიელზეა დამოკიდებული - თუ ნანი კონტრაქტს არ გააფორმებს, „იუნაიტედი“ მის მსურველ კლუბს მოძებნის და სავარაუდოდ, სეზონის ბოლოს გაყიდის.
26 წლის ვინგერი „ოლდ ტრაფორდზე“ პორტუგალიის „სპორტინგიდან“ 2007 წლის ივლისში, 14 მილიონ ფუნტად გადაბარგდა. „მანჩესტერში“ კი რა თქმა უნდა ზარალის მიღება არ სურთ და მის გაყიდვას შედარებით დიდ თანხად შეეცდებიან.
სერ ალექს ფერგიუსონმა თავისი დამოკიდებულება ამ საკითხზე რამდენიმე დღის წინ, „რედინგთან“ გამართული მატჩის შემდეგ გამოხატა. ნანის სათადარიგოთა სკამიდან თამაშის ყურების ნაცვლად, პირველ გუნდში ადგილის დამკვიდრება სურს, რაზეც შოტლანდიელმა ულტიმატუმითვე უპასუხა:
“ნანი ჩვენი გუნდის ერთ-ერთი წამყვანი ფეხბურთელია. გვსურს, რომ ის კლუბში დარჩეს. ლუისს გარანტირებული ექნება ადგილი პირველ გუნდში თუ ითამაშებს ისე, როგორც ეს „რედინგთან“ გააკეთა.“ - განაცხადა ფერგიუსონმა.

წყარო: thesun.co.uk