პრემიერ ლიგის მე-19 ტურის შეხვედრაში "მანჩესტერ იუნაიტედმა" "ნიუკასლს" უმასპინძლა და მეტოქე 4-1 დაამარცხა. სკოტ მაკტომინეიმ მეორე ტაიმის დასაწყისშივე დატოვა მოედანი. როგორც აღმოჩნდა, შოტლანდიელმა ფეხბურთელმა მუხლის ტრავმა მიიღო.
"მან მუხლის დაზიანება მიიღო. არ ვიცი, ეს რამდენად ცუდია" - განაცხადა მატჩის შემდგომ სოლსკიაერმა.
23 წლის ნახევარმცველმა შესაძლოა, "ბარნლისთან" გასამართი მატჩი გამოტოვოს, რომელიც შაბათს შედგება. აღსანიშნავია, რომ მაკტომინეიმ "ოლდ ტრაფორდი" ყავარჯნებით დატოვა.
Opta-მ საინტერესო სტატისტიკა შემოგვთავაზა, შოტლანდიელმა ფეხბურთელმა გუშინდელი შეხვედრის 24-ე წამზე ყვითელი ბარათი მიიღო - ეს უკანასკნელ 12 წელიწადში ინგლისის პრემიერ ლიგაში ყველაზე სწრაფი გაფრთხილებაა.