იტალიური მედიის თანახმად, ალექსის სანჩესი იტალიაში დაბრუნებასთან ახლოსაა. როგორც Sky Italia იუწყება, "ინტერისა" და "მანჩესტერ იუნაიტედის" წარმომადგენლებს შორის პირველადი შეთანხმება უკვე შედგა. როგორც ცნობილია, ჩილელი ფეხბურთელი იტალიურ გრანდში იჯარის წესით გადაბარგდება, მომავალ ზაფხულს კი "ინტერს" მისი გამოსყიდვა შეეძლება.
მიუხედავად სოლსკიაერის განცხადებისა, სადაც აღნიშნა, რომ სანჩესი მის გეგმებში შედის, კლუბის ხელმძღვანელები ჩილელის გასაშვებად მზად არიან. უკანასკნელ პერიოდში 30 წლის შემტევი ასევე "ნაპოლის", "რომასა" და "იუვენტუსს" დაუკავშირეს. შეგახსენებთ, რომ იტალიაში სატრანსფერო ფანჯარა 2 სექტემბერს იხურება.
გასულ სეზონში ალექსის სანჩესმა "იუნაიტედის" მაისურით 27 მატჩში ითამაშა, 2 გოლი გაიტანა და 4 საგოლე პასი მიითვალა. ჩილელს "იუნაიტედში" ყველაზე მაღალი ხელფასი აქვს, თუმცა არა თუ გუნდის ლიდერი, არამედ სასტარტო შემადგენლობის წევრიც აღარ არის.
შეგახსენებთ, რომ ზაფხულის სატრანსფერო ფანჯარაზე "ინტერმა" "მანჩესტერ იუნაიტედიდან" რომელუ ლუკაკუს დამატება უკვე შეძლო.