ხორვატი ფეხბურთელი ტრანსფერში საკუთარ ჩართვას დათანხმდა.
მილანის "ინტერის" ვინგერი ივან პერიშიც მზად არის, "მანჩესტერ იუნაიტედიდან" რომელუ ლუკაკუს "ინტერში" გადასვლას საკუთარი მონაწილეობით შეუწყოს ხელი.
როგორც ცნობილია, ბელგიელ ფორვარდს "იუნაიტედის" დატოვება და სერია A-ს გრანდში გადასვლა აქვს გადაწყვეტილი, რისი წინააღმდეგიც არ არის კლუბის ხელმძღვანელობა მას შემდეგ, რაც მან საჯაროდ განაცხადა მილანელთა ახალ მთავარ მწვრთნელ ანტონიო კონტესთან მუშაობის სურვილის შესახებ.
თუმცა ტრანსფერის განხორციელებას ის უშლის ხელს, რომ "წითელი ეშმაკები" ლუკაკუში 75 მლნ. ფუნტს ითხოვენ, რისი გადახდის საშუალებაც არ აქვს "ინტერს" ფინანსური ფეირ-პლეის წესებიდან გამომდინარე.
სწორედ ამიტომ გეგმავს "სან სიროს" მკვიდრი გუნდი რამდენიმე ფეხბურთელთან განშორებას და მათი საშუალებით კლუბში სახსრების მოძიებას, რათა კონტემ სასურველ მიზანს ამჯერად მაინც მიაღწიოს 2017 წლისგან განსხვავებით და ლუკაკუ თავის გუნდში გადაიბიროს.
მაგრამ "ინტერში" განიხილავენ სხვა ვარიანტსაც, რაც ტრანსფერში პერიშიჩის ჩართვას გულისხმობს, რისი წინააღმდეგიც არ არის თავად ფეხბურთელი.
თავის დროზე "იუნაიტედში" ივანის გადაყვანა ყოფილ მთავარ მწვრთნელ ჟოზე მოურინიოს სურდა, მაგრამ მაშინ ინგლისური და იტალიური კლუბი ტრანსფერზე ვერ შეთანხმდნენ და ხორვატმა კლუბი არ შეიცვალა.
ამჯერად კი მას ძალიან სურს "ოლდ ტრაფორდზე" გადასვლა და ამისთვის "ინტერს" ლუკაკუს შეძენაში დახმარებას სთავაზობს, რაც "ინტერის" ფინანსურ უსუსურობას გადაფარავს და კლუბს არც ფეირ-პლეის დარღვევა მოუხდება.
მაგრამ ხორვატი ფეხბურთელი უკვე 30 წლის გახლავთ, ოლე გუნარ სოლსკიაერს კი ახალგაზრდების შეძენის გეზი აქვს აღებული, ამიტომ რამდენად საინტერესო იქნება "იუნაიტედისთვის" ეს წინადადება, საეჭვოა.
წყარო:
gazzeta dello sport