პრემიერ ლიგის რიგით 36-ე ტურში, ოთხეულისთვის მებრძოლმა "მანჩესტერ იუნაიტედმა" საქმე ძალიან გაირთულა. მასპინძლებმა "ოლდ ტრაფორდზე", ჩემპიონთა ლიგის საგზურისთვის მებრძოლი, კიდევ ერთი გუნდი ლონდონის "ჩელსი" მიიღეს და მაურიციო სარის კლუბთან ქულები გაიყვეს, შეხვედრა მინიმალური საყაიმო ანგარიშით 1-1 დასრულდა.
მასპინძელთა მხრიდან თავი ხუან მატამ გამოიჩინა, ხოლო სტუმართა მიერ გატანილ გოლში, უდიდესი წვლილი "წითელი ეშმაკების" ესპანელმა კიპერმა დავიდ დე ხეამ შეიტანა. დე ხეა რუდიგერის შორეულ დარტყმას შესაფერისად ვერ დაუხვდა, რის შემდეგაც გამოვარდნილ ბურთზე მარკოს ალონსომ იმოქმედა და ბურთი "წითლების" კარის ბადეში გაეხვა, პირველ ტაიმში გუნდები ამ ანგარიშით გავიდნენ.
შეხვედრის შემდეგ კომენტარი ოლე გუნარ სოლსკიაერმა გააკეთა, ჟურნალისტებისთვის მიცემულ ინტერვიუში ნორვეგიელმა სპეციალისტმა განაცხადა, რომ დე ხეას სათადარიგო სკამზე ვერ ხედავს და მისი რომეროთი ჩანაცვლების საჭიროება ამ ეტაპზე არ დგას.
"შეიძლებოდა თუ არა, რომ დე ხეა სათადარიგო სკამზე დამესვა? არა. დევიდი "მანჩესტერ იუნაიტედისთვის" ფანტასტიკური მეკარეა. მან "სიტისთან" თამაშის შემდეგ კარგი რეაქცია გამოავლინა, რის შემდეგაც მე მასში დარწმუნებული ვიყავი. მან იცის, რომ ნებისმიერ გაშვებულ გოლზე შეიძლება მიიღო დარტყმა, ეს ჩვეულებრივი სამუშაო მომენტია.
ისევე როგორც "მანჩესტერ სიტისთან" მატჩში, კარგად შევედით თამაშის მსვლელობაში, თუმცა საკუთარი რიტმის პოვნა ვერ შევძელით. ჩვენ გვჭირდებოდა შესამჩნევად მაღალი ტემპი, ამავდროულად ინტენსიური ქმედებები, ჩვენ ამის მიღწევა ვერ შევძელით". - ციტირებს Sky Sports - ოლე გუნარის სიტყვებს.