ოლე გუნარ სოლსკიაერმა "მანჩესტერ იუნაიტედის" მარცხზე ისაუბრა. ნორვეგიელის განცხადებით, "წითლები" ახლა პრემიერ ლიგაზე უნდა კონცენტრირდნენ.

მატჩის შემდგომ მწრთვნელმა გაშვებულ მომენტებსა და თამაშის დასაწყისზე ისაუბრა. ასევე "ბარსელონას" ფეხბურთელების სიძლიერესაც გაუსვა ხაზი. შემდგომ კი შიდა ჩემპიონატზე გადაერთო.

ჩვენი განწყობა სწორი იყო.

"ჩვენ ყველაფერი კარგად გავაკეთეთ აქამდე მოსასვლელად და ორი სხვადასხვა გუნდი დავინახეთ. ჩვენ ძალიან კარგად დავიწყეთ და იდეალური 15 წუთი ჩავატარეთ და ვიფიქრეთ კიდეც, რომ რაღაცის გაკეთებას შევძლებდით, მაგრამ ოთხ წუთში ორი გოლი გაგვიტანეს, რამაც ყველაფერი უფრო და უფრო რთული გახადა. განწყობა ზუსტი და შესაბამისი იყო. ჩვენ ვიცოდით, რომ კარგი გუნდისა და კარგი ფეხბურთელების წინააღმდეგ ვთამაშობდით. ვიცით, რომ სამუშაო ჯერ კიდევ ბევრია. ჩვენ ვთქვით, რომ ეს ერთ ღამეში ვერ შეიცვლებოდა და მომდევნო წლების განმავლობაში ბევრი უნდა ვიმუშავოთ, რათა ისეთი გუნდების დონეზე ავიდეთ, როგორზეც "ბარსელონაა".

ჩვენ მომენტების გამოყენება ვერ შევძელით.

"როდესაც უკვე ასეთ დონეზე ხარ მოსული, ასე მარტივად ფეხი არ უნდა დაგიცდეს და შეცდომები არ უნდა დაუშვა. ყველა მომენტი უნდა გამოიყენო. ჩვენ ჩვენი დიდებული დასაწყისი ვერ გამოვიყენეთ. მათ პირველი ორი დარტყმა გოლად აქციეს და შემდგომ უკვე თამაში დასრულებული იყო."

როგორ უნდა შეაჩერო ლიონელ მესი?

"ის განსხვავებული კლაია. ის და რონალდუ ბოლო წლებია მსოფლიოს საუკეთესო ფეხბურთელები არიან და ვფიქრობ, რომ ამას ყველა ეთანხმება. დღეს საღამოს კიდევ ერთხელ დავინახეთ მისი დონე. სწორედ "ბარსელონას" გუნდის დონეზე უნდა ვიყოთ და ამისთვის ვიბძოლოთ. ვიცით, რომ ჯერ იმ დონეზე არ ვართ, მაგრამ ისიც ვიცით, რომ იქამდე მისვლას შევძლებთ."

ალექსისის დაბრუნება.

"მარტის დასაწყისიდან ალექსისი ტრავმირებული იყო და ექვსი კვირის განმავლობაში მატჩის ჩატარება ვერ მოახერხა. ძალიან მნიშვნელოვანი იყო მისთვის, რომ ეს 15 წუთი მოედანზე გაეტარებინა. გოლის გატანასთანაც ახლოს გახლათ. იმედი მაქვს, რომ ის დამატებითი ძალა იქნება ჩვენთვის და ოთხეულში გასვლაში დაგვეხმარება."

დროა, რომ ყველა რესურსი გამოვიყენოთ.

"ჩვენ ერთმანეთისგან მაქსიმუმი უნდა ამოვიღოთ. უმაღლესი დონის გარემო უნდა შევქმნათ უმაღლესი განწყობით. ამ მომენტში ჩვენ მართლა ძალიან, ძალიან კარგი საქმე გავაკეთეთ მეოთხედფინალამდე მისვლით და ახლა ჩვენი გამოწვევა ოთხეულია. ჩვენ ყველაფერი თავიდან უნდა შევქმნათ, ჯერ მწრთვნელებით, შემდგომ ფეხბურთელებით. ერთ ან ორ ფეხბურთელს ამ ზაფხულში აუცილებლად დავიმატებთ."

წინ დიდი კვირაა.

"ჩვენ ჩემპიონთა ლიგაზე თამაში მომავალ წელსაც გვსურს, ასე რომ წინ დიდებული კვირა გველის. "ევერტონი", "მანჩესტერ სიტი" და "ჩელსი"... რა თქმა უნდა, იმედგაცრუებულები ვართ, მაგრამ ახლა ვერაფერს ვიზამთ. ყველაფერი გაცილებით უკეთ იქნებოდა, თუ უკეთ დავიწყებდით და ჩვენ გავიტანდით პირველ გოლს, მაგრამ ახლა ისღა დაგვრჩენია, რომ შემდეგ კვირაზე ვკონცენტრირდეთ."


წყარო: ManUtd.com