"მანჩესტერ იუნაიტედის" ახალგაზრდა ფორვარდი, მარკუს რეშფორდი, ბოლო დროს საოცარ ფორმაშია. ინგლისელი სწორედ იმას აკეთებს, რაც გუნდს ასე ძალიან სჭირდება - ბევრ მომენტს იღებს თავის თავზე და მათი შესრულება არც თუ ისე ცუდად გამოსდის.

ნიჭიერი ფორვარდით "რეალ მადრიდი" დაინტერესდა. ესპანელებს ინგლისელის "ბერნაბეუზე" წაყვანა სურთ. როგორც პრესაში იწერება, "რეალ მადრიდი" შეთავაზებას მარკუს რეშფორდის ახალი კონტრაქტის გაფორმებამდე გააკეთებს.

"რეალ მადრიდი" "მანჩესტერ იუნაიტედს" 100 მილიონ ფუნტს შესთავაზებს, რაც 131 მილიონი დოლარია. "The Sun"-ის განცხადებით, ესპანელები ინგლისელებს ზაფხულის ტრანსფერებამდე დაუკავშირდებიან.

"იუნაიტედი" ყველაფერს აკეთებს რეშფორდის შესანარჩუნებლად. ხელმძღვანელობა აქტიურად მუშაობს ახალი კონტრაქტის შესათავაზებლად და 21 წლის ფორვარდის "ოლდ ტრაფორდზე" დასატოვებლად.

თუმცა "რეალ მადრიდი" რეშფორდს მსოფლიოში ნომერ პირველ ფორვარდად ქცევას ჰპირდება და ესპანელების განცხადებით, ისინი "იუნაიტედის" შეთავაზებას გადაჩრდილავენ.


წყარო: Goal.com