ნორვეგიელის მოსვლის შემდეგ "მანჩესტერ იუნაიტედმა" რვა მატჩი ჩაატარა. "წითლებმა" რვა თამაშიდან რვავეში მოიპოვეს გამარჯვება. ოლე გუნარმა "პრემიერ ლიგის" ექვსეულში შემავალი ორი გუნდის დამარცხება უკვე შეძლო. საერთო ჯამში 22 გოლი გაიტანა და მხოლოდ 5 გაუშვა. გუშინ "ეშმაკუნებს" "მეთოფეების" სტუმრობა მოუწიათ, სადაც მასპინძლები "იუნაიტედმა" 3-1 ანგარიშით დაამარცხა.
"მე ძალიან ბედნიერი ვარ, რადგან ვფიქრობ, რომ ძალიან კარგად ვმუშაობთ, თუმცა, რა თქმა უნდა, შედეგი ძალიან ცუდია. დღეს ეს შედეგი მივიღეთ და მივიღეთ ტრავმები. გვქონდა მომენტი, როცა შეგვეძლო დავწინაურებულიყავით და მოგვეგო თამაში, თუმცა ისევ და ისევ ტრავმები - განსაკუთრებით ლორან კოსელნის ტრავმა. რა თქმა უნდა, ამან უკან დაგვხია, რადგან ტემპი დაეცა," - განაცხადა უნაი ემერიმ მატჩის შემდეგ. "მომენტებში ჩვენ მათი საჯარიმო დავიპყარით, თუმცა ბოლო აკორდი ვერ დავსვით და მომენტები გოლებად ვეღარ ვაქციეთ. ჩვენ მეტს ვიმსახურებდით, მაგრამ "მანჩესტერ იუნაიტედის" წინააღმდეგ ვთამაშობდით. ისინი მიმდინარე სეზონის საუკეთესო ფორმაში იმყოფებიან. მათ ბევრი ისეთი ფეხბურთელი ჰყავთ, რომლებსაც შეუძლიათ, რომ მატჩი სრულიად შემოატრიალონ. მარკუს რეშფორდი და ენტონი მარსიალიც მათ შორის,"- დაასრულა უნაი ემერიმ.
მატჩის შესახებ ისაუბრა დაუმარცხებელმა ოლე გუნარმაც:
"ჩვენთვის ეს მატჩი წინ გადადგმული ნაბიჯია, თუნდაც ხარისხისა და გუნდურობის მიხედვით. გუნდი სტრუქტურულად და დაწყობილად თამაშობდა. ბევრად უფრო უკეთ ვიდრე "ტოტენჰემთან". იმ მატჩში, ფაქტობრივად, დე ხეამ გადაგვარჩინა."
"ჩვენ ძალიან ბევრი ვიმუშავეთ ამაზე. დაცვაში პრობლემებია და გამოსწორება გვჭირდება. აქ იმისთვის არ ვარ, რომ ავღელდე და განვითარება შევწყვიტო, აქ იმისთვის ვარ, რომ გუნდი დღითიდღე უფრო და უფრო გავაუმჯობესო, ფეხბურთელები გავაუმჯობესო და და შემდეგ მატჩებს დაველოდო. შემდეგში დიდებული მატჩი გველის, "პრემიერ ლიგაში" ვბრუნდებით."