"მანჩესტერ იუნაიტედმა" რამდენიმე წუთის წინ ოფიციალურ საიტზე განცხადება გამოაქვეყნა. განცხადების შინაარსის მიხედვით, მაკტომინეიმ ახალ კონტრაქტს მოაწერა ხელი და კლუბში 2023 წლამდე დარჩება. კონტრაქტი მისი გახანგრძლივების ერთწლიან შესაძლებლობასაც მოიცავს.

"ხუთი წლის ასაკიდან ეს გუნდი ჩემი ცხოვრებაა. მე ყოველთვის ამ კლუბს ვგულშემატკივრობდი და ახლა მისი მაისურით თამაში საოცარი შეგრძნებაა."

"მე ჯერ კიდევ ძალიან ახალგაზრდა ვარ და მუდმივად ვსწავლობ მწრთვნელისგან და მისი დამხმარეებისგან და, რა თქმა უნდა, სხვა მსოფლიო დონის ფეხბურთელებისგანაც."

"ერთი სული მაქვს, როდის განვაგრძობ ამ დიდებულ კლუბში პროგრესირებას."

სკოტის შესახებ ოლე გუნარმაც ისაუბრა:

"სკოტი კლუბში ძალიან მცირე ასაკიდან თამაშობს. მან ჩვენი აკადემიის საფეხურები გაიარა და ბოლო რამდენიმე წლის განმავლობაში ფანტასტიკური შედეგი აჩვენა."

"ის ახალგაზრდაა და მუდმივად ვითარდება. ძალიან ნიჭიერი და ინტელექტუალია და ყოველთვის სწავლასაა მოწყურებული."

"მიხარია, რომ მან ახალ კონტრაქტს მოაწერა ხელი და დარწმუნებული ვარ, რომ "იუნაიტედში" საოცარი მომავალი ელის."


წყარო: ManUtd.com