პრემიერ ლიგის 22-ე ტურში "მანჩესტერ იუნაიტედმა" დაძაბულ ორთაბრძოლაში "ტოტენჰემი" მინიმალური ანგარიშით დაამარცხა და ზედიზედ მეხუთე გამარჯვება მოიპოვა. შეხვედრაში ერთადერთი გოლი მარკუს რეშფორდის ანგარიშზეა, რომელმაც პოლ პოგბას ბრწყინვალე გადაცემით ისარგებლა.

"სიამოვნებას ვიღებ ასეთი თამაშისგან, ჩემთვის ძალიან რთული იყო იმ ტაქტიკასა და სისტემაზე მორგენა, რაც წინა მწვრთნელის დროს გვქონდა. უფრო მომწონს შეტევა, პრესინგი და მაღლა თამაში, ვიდრე დაცვა".

"მწვრთნელმა მითხრა, რომ საჯარიმოში მეთამაშა, რადგან სჯეროდა, გოლს გავიტანდი. მეხმარება იმის ცოდნა, რომ მატიჩი მაზღვევს და შემიძლია, მაღალ პრესინგზე წავიდე და მეც სწორედ ასე ვიქცევი მწვრთნელის მოსვლის შემდეგ, რადგან დაზღვეულიც ვარ და თავისუფლებაც მაქვს" - განაცხადა ფრანგმა ნახევარმცველმა.

აღსანიშნავია, რომ ოლე გუნარ სოლსკიაერის გუნდში მოსვლის შემდეგ, პრემიერ ლიგის შეხვედრებში პოლ პოგბას "იუნაიტედის" ფეხბურთელებს შორის საუკეთესო მაჩვენებელი აქვს - ფრანგ ფეხბურთელს ყველაზე მეტ, რვა გოლში აქვს მონაწილეობა მიღებული. 25 წლის ფეხბურთელმა ოთხი გოლი და ოთხი საგოლე გადაცემა მიითვალა.