პოლ პოგბამ ჟოზე მოურინიოს მადლობა გადაუხადა. ფრანგის განცხადებით, პორტუგალიელი მას ტიტულების მოგებასა და მისი, როგორც პიროვნების, გაზრდაში დაეხმარა.

პოგბასა და მოურინიოს არც თუ ისე კარგი ურთიერთობა ჰქონდათ. თუმცა თამაშის შემდეგ პოგბამ მოურინიოზე ისაუბრა და პორტუგალიელს მადლობაც კი გადაუხადა.

"ვიცი, რომ ჟოზესა და დღევანდელი შედეგების შესახებ რაღაცას ელოდებით. რა თქმა უნდა, ჩვენ ძალიან ბედნიერები ვართ შედეგებით. ჩვენ ძალიან კარგად ვითამაშეთ და გუნდიც საერთო ჯამში შესანიშნავად წარდგა მაყურებლის წინაშე. ვიცი, რომ ჟოზეს შესახებ რაიმე მსგავსს ელოდებით: "აი, ჟოზეს დროს კი ჩვენ ამას ვერ შევძლებდით."

"ჟოზეს დროს ჩვენ ტიტულები მოვიგეთ და მინდა, რომ ამისთვის მადლობა გადავუხადო. ყველაფერს კარგად არ უმუშავია, მაგრამ ტიტულები მოვიგეთ. ტიტულების მოგება შენი, როგორც პიროვნების განვითარებაშიც გეხმარება. ეს ყველაფერი უკვე წარსულია. მაინც მინდა, რომ მას მადლობა გადავუხადო."

"დარწმუნებული ვარ, რომ ყველა ფეხბურთელი უკვე შემდეგ თამაშზე ფიქრობს. ქულები, ქულები და ისევ ქულები - აი, რა ტრიალებს ჩვენს თავში. ძალიან გვსურს ოთხეულში დაბრუნება. მხოლოდ ამის თქმა შემიძლია. გუნდი შესანიშნავად წარსდგა თქვენ წინაშე. ბედნიერები ვართ, რომ ოლე გუნარის პირველი თამაში ასე დაიწყო და ძალიან მნიშვნელოვანია, რომ ასევე განვაგრძოთ," - დაასრულა ფრანგმა.


წყარო: M.E.N.