"მანჩესტერ იუნაიტედის" მთავარი მწვრთნელის მოვალეობის დროებითი შემსრულებელი ოლე გუნარ სულშერი დარწმუნებულია, რომ გუნდის სატრანსფერო პოლიტიკაზე მომდევნო თვეში გავლენა ექნება.

"წითელი ეშმაკები" ბოლო სატრანსფერო ბაზარზე ვერ გაძლიერდნენ და მოსალოდნელია, რომ იანვარში ამის გაკეთებას კიდევ ერთხელ ეცდებიან - პირველ რიგში ცენტრალური მცველის შეძენით. სულშერს კი ამაში უშუალო მონაწილეობა ექნება, მიუხედავად იმისა, რომ დროებითი სამსახური აქვს.

"რა თქმა უნდა, გავლენა მექნება. ჩემი ამჟამინდელი დავალება ყველა ფეხბურთელთან გაცნობა, მათი შეფასება და მათი უნარების გაგებაა.

ნორვეგიაში რომ ვმუშაობდი, თავისუფალ დროს თითქმის ყველა მათ შეხვედრას ვუყურებდი. მაგრამ ჯერ ფეხბურთელები უნდა გავიცნო, რათა მივხვდე, რა არის მათში გასაუმჯობესებელი. ეს არის ჩემი სამუშაო.

კლუბს ჰყავს მოლაპარაკებებსა და სკაუტთა სამუშაოზე პასუხისმგებელი პირები და დარწმუნებული ვარ, გარკვეული სამიზნეები უკვე მონიშნეს. მაგრამ ჯერ ვერ მოვასწარი მათთან საუბარი, რადგან მანამდე უნდა მოვახერხო, რომ ჩვენს განკარგულებაში არსებულმა ფეხბურთელებმა კვლავ მიიღონ სიამოვნება ფეხბურთისგან".