"ბრაიტონთან" გამართული მატჩის მეორე ტაიმი შეცვლით დაიწყო, პირველი 45- წუთის შემდეგ ლუკ შოუ ეშლი იანგმა ჩაანაცვლა. ცუდი სათამაშო პირობებისა და მისი ტრამვებისადმი მიდრეკილების გამო, გაჩნდა ვარაუდები მორიგი ტრამვის შესახებ, მაგრამ მოურინიომ პრესკონფერენციაზე ყველაფერს ნათელი მოჰფინა.
პორტუგალიელი სპეციალისტი, რომელიც წარსულში ნაკლებად გამოირჩეოდა პრესკონფერენციაზე საკუთარი შეგირდების კრიტიკით, ამჯერად ორივე ფლანგის მცველის, ლუკ შოუსა და ანტონიო ვალენსიას გარჯა უარყოფითად შეაფასა, და ეკვადორელი მხოლოდ და მხოლოდ პოზიციურად კარგი თამაშის გამო დატოვა მინდორზე.
ინგლისელ ახალგაზრდას მატჩის მიმდინარეობისასვე ურჩია კლუბის დატოვება "იუნაიტედის" ყოფილმა ფეხბურთელმა პოლ სკოულზმა. დღეს გავრცელებული ინფორმაციით კი, შოუსთვის და მისი სპორტული აგენტისთვის, აღნიშნული კომენტარი ბოლო წვეთი იყო და ზაფხულში ყველა ღონეს იხმარენ კლუბის დასატოვებლად.
"საუთჰემტონის" აკადემიის აღზრდილით აქტიურად ინტერესდებოდა ლონდონის "ტოტენჰემი", რომელსაც შოუსთვის კარგად ნაცნობი, "წმინდანების" ყოფილი თავკაცი მაურისიო პოჩეტინიო ხელმძღვანელობს.