ჟოზე მოურინიომ განაცხადა, რომ პრემიერ ლიგის ეგიდით "ლივერპულთან" გასამართი მატჩის წინ გუნდს მარუან ფელაინი დაუბრუნდება.
ბელგიელ ნახევარმცველს 31 იანვრის შემდეგ არ უთამაშია და იმავე დღეს მიღებული ტრავმის გამო მუხლზე ოპერაცია გაიკეთა.
მწვრთნელმა ასევე დაადასტურა, რომ სრულ მზადყოფნაშია ერიკ ბაიი, რომელმაც სამთვიანი უქმობის შემდეგ ორი მატჩი ჩაატარა შეცვლაზე შესვლის შედეგად.
მატჩის წინა პრესკონფერენციაზე მწვრთნელმა განაცხადა: "დიახ, ბაიი სრულ მზადყოფნაშია უკვე ერთი კვირაა. დიახ, ის კარგადაა. ერთადერთი, ვინც გუნდს უბრუნდება, ფელაინია."
კლუბის ოფიციალურ ტელევიზიასთან საუბრისას კი ჟოზემ ასევე დაადასტურა, რომ ენტონი მარსიალი კვლავ ტრავმირებულია და ვერ ითამაშებს.
"ძირითადად იგივე შემადგენლობაა. ტრავმირებული ხალხი ნაბიჯ-ნაბიჯ პროგრესირებს და რამდენიმე მათგანი ძალიან, ძალიან ახლოსაა გამოჯანმრთელებასთან, მაგრამ ჯერ არ არის. კარგად ვართ, ყველაფრისთვის გვყავს შემადგენლობა. რაოდენობა, რომელიც ავირჩიეთ - 23 - მათი დაცვის მიზნით იყო არჩეული და ამას თავს ვართმევთ".