პრემიერ ლიგის 28- ე ტურის ცენტრალური მატჩი "ოლდ ტრაფორდზე" გაიმართა. ერთმანეთს პრინციპული მოწინააღმდეგეები "იუნაიტედი" და "ჩელსი" დაუპირისპირდნენ. შეხვედრა მასპინძლების გამარჯვებით ანგარიშით 2-1 დასრულდა. კარგი მატჩი ჩაატარა "წითლების" ბელგიელ შემტევმა რომელუ ლუკაკუმ რომელმაც პირად აქტივს ერთი გოლი და ამდენივე საგოლე გადაცემაც შემატა.

საფინალო სასტვენის შემდეგ, რომელუ ლუკაკუმ ჟურნალისტებისთვის მიცემულ ინტერვიუში განაცხადა, რომ თავს ფსიქოლოგიური ზეწოლის ქვეშ არ გრძნობს.

"ეს შესანიშნავი დღეა ჩემთვის გუნდს გამარჯვების მიღწევაში დავეხმარე გოლით და საგოლე გადაცემით. საბოლოო ჯამში ჩვენ გავიმარჯვეთ და ეს ორმაგად ბედნიერს მხდის. როდესაც გამარჯვების გოლს იტან ეს ძალიან კარგია, მაგრამ ვფიქრობ, რომ პირველ ტაიმში გატანილი გოლი რომელმაც წონასწორობა აღადგინა ძალზედ სასიამოვნო იყო.

მე რაიმე ფსიქოლოგიურ ზეწოლას არ ვგრძნობ. ჩვენ მაღალი ხარისხი და გამარჯვების სურვილი განსაკუთრებით შეხვედრის მეორე ნახევარში ვაჩვენეთ. ვფიქრობ ნეიტრალური მხარის გულშემატკივარმა ამ შეხვედრიდან დიდი სიამოვნება მიიღო".- ციტირებს ВВС ლუკაკუს სიტყვებს.



წყარო: euro-football