გუშინ "ოლდ ტრაფორდზე" "ჰადერსფილდთან" მოგებული მატჩის შემდეგ "მანჩესტერ იუნაიტედის" მთავარმა მწვრთნელმა ჟოზე მოურინიომ კვლავ გამოხატა უკმაყოფილება სტადიონზე არსებული ატმოსფეროთი.

მიმდინარე სეზონში პორტუგალიელმა არაერთხელ გააკრიტიკა "იუნაიტედის" ქომაგები, ამ უკანასკნელებმა კი ის შეხვედრაზე მიიწვიეს, რათა ტრიბუნებზე არსებული მდგომარეობა განეხილათ.

მოურინიომ ეს მიწვევა არ მიიღო და თავისი გადაწყვეტილება იმით ახსნა, რომ ის ვერ დაელაპარაკება 75 ათას გულშემატკივარს და ვერ მოისმენს ყველას აზრს, თუმცა შეუძლია საჯაროდ მოისმინოს მათი კომენტარები.

სიტუაციის უცვლელობის შემდეგ ჟოზე კვლავ არ მალავს თავის უკმაყოფილებას და განაგრძობს კრიტიკას.

"მიუხედავად იმისა, რომ წყნარ სტადიონზე ვთამაშობთ, ნათელია, რომ ფეხბურთელები აქ თავს კარგად გრძნობენ.

"ოლდ ტრაფორდზე" არსებული ატმოსფერო სულაც არ ჰგავს "პორტსმუთის" საშინაო მატჩების ატმოსფეროს. მათი პატარა სტადიონი კარგად მახსოვს, სადაც დაუჯერებელი მხარდაჭერაა. "ოლდ ტრაფორდზე" კი გაცილებით წყნარი მდგომარეობაა", - განაცხადა მწვრთნელმა.