პრემიერ ლიგის მე-4 ტურის შეხვედრაში "სტოკ სიტიმ" "მანჩესტერ იუნაიტედს" უმასპინძლა. მანჩესტერელებმა პირველი ქულები დაკარგეს, შეხვედრა ფრედ, 2-2 დასრულდა.

მატჩის 57-ე წუთზე მხითარიანის გადაცემით რომელუ ლუკაკუმ ისარგებლა და მეტოქის კარი აიღო. ეს გოლი ბელგიელისთვის საიუბილეო აღმოჩნდა, ლუკაკუმ კლუბებში ასპარეზობისას მეტოქის კარი 150-ჯერ აიღო.

24 წლის ბელგიელმა ყველაზე მეტი, 87 გოლი "ევერტონის" რიგებში გაიტანა, 41 "ანდერლეხტის" მაისურით, 17 "ვესტ ბრომვიჩის" რიგებში, ხოლო 5 კი "იუნაიტედის" მაისურით.

ლუკაკუმ პრემიერ ლიგის ეგიდით ჩატარებულ 190 შეხვედრაში 89 გოლის გატანა და 28 საგოლე გადაცემის გაკეთება მოახერხა.