უეფას სუპერთასის შეხვედრაში ერთმანეთს "რეალ მადრიდი" და "მანჩესტერ იუნაიტედი" დაუპირისპირდნენ, სადაც ზინედინ ზიდანის გუნდმა ევროპა ლიგის გამარჯვებულს დაძაბულ ბრძოლაში აჯობა.

მადრიდელები პირველივე ტაიმიდან ფლობდნენ უპირატესობას, რასაც 24-ე წუთზე გატანილი გოლი მოჰყვა. კარვახალის დიდებული გადაცემით კაზემირომ ისარგებლა და ანგარიში გახსნა. ესპანელებმა მეორე ტაიმში სხვაობა ორამდე გაზარდეს, ლამაზი კომბინაცია ისკომ დააგვირგვინა და დე ხეას კარი აიღო. 62-ე წუთზე მოურინიოს გუნდმა ერთი ბურთის გაქვითვა მოახერხა, თავი ლუკაკუმ გამოიჩინა. მანჩესტერელებს მატჩის გადასარჩენად 30 წუთი ჰქონდათ, თუმცა გოლის გატანა ვეღარ მოახერხეს. მატჩი "რეალის" გამარჯვებით, ანგარიშით 2-1 დასრულდა.

შემადგენლობები

რეალი: ნავასი, კარვახალი, ვარანი, რამოსი, მარსელო, მოდრიჩი, კაზემირო, კროოსი, ისკო (ვასკესი 74'), ბენზემა (რონალდუ 83'), ბეილი (ასენსიო 74').

იუნაიტედი: დე ხეა, ლინდელოფი, სმოლინგი, დარმიანი, ვალენსია, ერერა (ფელაინი 56'), მატიჩი, პოგბა, ლინგარდი (რეშფორდი 46'), მხითარიანი, ლუკაკუ.