MANUTD.GE აგრძელებს თქვენთან ერთად "იუნაიტედის" სატრანსფერო სამიზნეების განხილვას. დღეს ჩვენ რაჯა ნაინგოლანზე გვექნება საუბარი.

რაჯა ნაინგოლანი

ასაკი: 29
მატჩი: 55
გოლი: 14
საგოლე გადაცემა: 8

შენიშვნა: მოცემულია 2016/17 წლების სეზონის სტატისტიკა საკლუბო და სანაკრებო დონეზე.

რაჯა ნაინგოლანი ის ფეხბურთელია, რომლის შეძენაც "იუნაიტედის" გულშემატკივართა ძალიან დიდ ნაწილს სურს. "იუნაიტედის" გულშემატკივრები ბელგიელში სრულიად დამსახურებულად ხედავენ თანამედროვე როი კინს. რა თქმა უნდა როი კინი შესაძლოა ფეხბურთს აღარ ჰყავდეს, მაგრამ რაჯას სათამაშო სტილი "იუნაიტედის" ირლანდიელი ლეგენდის სტილს ნამდვილად წააგავს. ბელგიელი გამოირჩევა თავისი მკაცრი და განსხვავებული ხასიათით, ამავდროულად ის ძალზე ხისტიცაა. მისი მთავარი პლუსი სწორედ ეს ხასიათი, ძლიერი დარტყმა და საფეხბურთო ინტელექტია.

როგორც ზემოთ აღვნიშნე, ნაინგოლანი მართლაც გამოირჩევა თავისი ხისტი თამაშით. ის არ ერიდება ორთაბრძოლებში შესვლას თუ ვარდნებს. მისთვის ეს ჩვეულებრივი სათამაშო სტილია, შესაძლოა მის ამ ვარდნებს ბევრჯერ მოჰყოლია კიდეც სულელურად მიღებული წითელი ბარათები, მაგრამ ფაქტია ყოველივე ეს მის სათამაშო სტილს არათუ აკნინებს, პირიქით ხიბლს მატებს.

გასულ სეზონში ნაინგოლანმა ნამდვილად მოუმატა ორგანიზებულობასა თუ სათამაშო დისციპლინაში. ასე მაგალითად 14/15 წლების სეზონში ბელგიელის ანგარიშზე 18 ყვითელი ბარათი იყო. 15/16 წლების სეზონში 12 ყვითელი და 1 წითელი ბარათი. 16/17 წლების სეზონში კი მხოლოდ 5 ბარათი. ყოველივე ეს იმაზე მიუთითებს, რომ ნაინგოლანი უფრო ორგანიზებული გახდა და ისწავლა საკუთარი ემოციების გაკონტროლება.

აუცილებლად უნდა აღინიშნოს მისი შედეგიანობა. 14/15 წლების სეზონში მის ანგარიშზე 5 გოლი იყო, 15/16 წლების სეზონში 6 გოლი, 16/17 წლების სეზონში კი მის ანგარიშზე უკვე 14 გოლია, ამასთან 7 საგოლე გადაცემა.

რომელ პოზიციაზე თამაშის დროს მოჰქონდა მას ყველაზე მეტი სარგებელი ? ცენტრალური და შემტევი ნახევარმცველის პოზიციიდან. გასულ სეზონში ცენტრალურ ნახევარდაცვაში მან 11 მატჩი ჩაატარა, ამ პოზიციიდან 3 გოლი გაიტანა და 1 საგოლე გადაცემა გააკეთა. შემტევი ნახევარმცველის პოზიციაზე კი მან 37 მატჩი ჩაატარა, 11 გოლი გაიტანა და 5 საგოლე გადაცემა გააკეთა. საკლუბო დონეზე ბოლო 3 წლის განმავლობაში ნაინგოლანმა 8 მატჩი ჩაატარა "ჩამშლელის" პოზიციაზე, აქედან მან ვერც გოლი გაიტანა და ვერც საგოლე გადაცემა გააკეთა. ეს იმას ნიშნავს, რომ ნაინგოლანი ჩამშლელი ნახევარმცველის პოზიციაზე ძალზედ დაბალი შედეგიანობით გამოირჩევა, მას ვერ გააქვს გოლი და ვერ აკეთებს საგოლე გადაცემას. თუმცა ამას შეგვიძლია საკუთარი ახსნაც ჰქონდეს, თუ მის კარიერას გადავავლებთ თვალს, ნაინგოლანი არ არის "ჩამშლელი" ნახევარმცველის ფეხბურთელი, მას ამ პოზიციაზე მატჩების საკმაოდ მცირე რაოდენობა აქვს ჩატარებული. კარიერის განმავლობაში ნაინგოლანი უმეტესად ცენტრალური ნახევარმცველის ან შემტევი ნახევარმცველის პოზიციაზე თამაშობს. ბოლო სეზონიდან კი ნათელი ხდება, რომ რაჯა შემტევი ნახევარმცველის პოზიციის ფეხბურთელია. მან ამ პოზიციაზე ყველაზე მეტი მატჩი ჩაატარა, გაიტანა ყველაზე მეტი გოლი და გააკეთა ყველაზე მეტი საგოლე გადაცემა ვიდრე სხვა პოზიციაზე თამაშისას. აქედან შეგვიძლია დავასკვნათ, რომ ნაინგოლანი "თავისუფლების" მოყვარული ფეხბურთელია და მას შეტევაში უყვარს თამაში.

რას მოუტანს ნაინგოლანი "იუნაიტედს" ? მანჩესტერის გულშემატკივრები ერთხმად თანხმდებიან, რომ გუნდს აუცილებლად ესაჭიროება ჩამშლელი ნახევარმცველი. გულშემატკივრები იმაზეც თანხმდებიან, რომ ცენტრალური ნახევარდაცვის სამეულიდან, ორი აუცილებლად უნდა იყოს პოლ პოგბა და ანდერ ერერა. როგორი იქნება "იუნაიტედის" ნახევარდაცვა ერერა-პოგბა-ნაინგოლანის შემთხვევაში ? პასუხი მარტივია, სუპერ შემტევი. მაგრამ რომელი ფეხბურთელი ითავებს დაცვით ფუნქციებს ? სამივე ფეხბურთელი არის შეტევაზე ორიენტირებული. პოგბას გვერდით აუცილებლად სჭირდება ფეხბურთელი, რომელიც შავ სამუშაოს შეასრულებს და მას თავისუფლებას მისცემს. რომელი იკისრებს ერერა-ნაინგოლანის წყვილიდან შავი სამუშაოას შესრულებას ? ანდერ ერერა რომელიც არ არის ჩამშლელი ნახევარმცველის პოზიციის ფეხბურთელი თუ ნაინგოლანი, რომელსაც თითქმის აღარ უთამაშია ამ პოზიციაზე, ხოლო თუ უთამაშია საშინლად უშედეგო ყოფილა.

სწორედ აქ იქმნება პრობლემა, "იუნაიტედს" სჭირდება "ბუნებით" ჩამშლელი ნახევარმცველი. "რეალში" ასეთი ფეხბურთელი იყო ჩაბი ალონსო, "ჩელსიში" მოურინიომ მისვლისთანავე შეიძინა ნემანია მატიჩი. "იუნაიტედში" კი მას ასეთი ჩამშლელი არ ჰყავს. რაჯა ნაინგოლანი კი ძალზედ მაღალი კლასის ფეხბურთელია, თუმცა ის არ არის ჩამშლელი. ის არ არის ალონსოს,მატიჩის თუ კანტეს დონის ჩამშლელი. ნაინგოლანი ბოლო წლებში ძალზედ გაიზარდა და უფრო მაღალი კლასის ფეხბურთელი გახდა, ოღონდ შემტევი ნახევარმცველის პოზიციაზე.

ჩნდება კითხვები, მზად არის ნაინგოლანი დაივიწყოს შეტევა და შეასრულოს შავი სამუშაო ? თუ ნაინგოლანი ერერას პოზიციაზე ითამაშებს, რაჯას და პოგბას სახით "იუნაიტედს" შეტევაში კრეატივი არ მოაკლდება, მაგრამ ითავებს მთელი სეზონის განმავლობაში ანდერ ერერა ჩამშლელის პოზიციაზე თამაშს ? ან შეძლებს ის ამას ? ერერა ძალზედ კარგი ფეხბურთელია, მაგრამ მისი სათამაშო პოზიცია არ არის "ჩამშლელი" ნახევარმცველი.

ასე რომ ნაინგოლანი გულშემატკივრებისთვის შესაძლოა ერთ-ერთი სასურველი შენაძენი იყოს, მაგრამ მოურინიოს სულ სხვა გეგმები და შეხედულება ჰქონდეს ბელგიელის მიმართ. სატრანსფერო ფანჯარა დღეს ოფიციალურად გაიხსნა, ამიტომ დაველოდოთ მოვლენების განვითარებას.

ტრანსფერის განხორციელების ალბათობა
6/10

ტრანსფერის სავარაუდო ღირებულება
£34 მილიონი

ავტორი: დავით სირაბიძე