"მანჩესტერ იუნაიტედის" მთავარმა მწვრთნელმა, ჟოზე მოურინიომ განაცხადა, რომ მიმდინარე სეზონში დარჩენილ ორ მატჩში მას დავიდ დე ხეას გამოყენება არ სურს და ესპანელს წინასასეზონო ტურნეზე ათამაშებს.
დე ხეა პრემიერ ლიგის რეგულარული სტარტერი იყო, მაგრამ "საუთჰემპტონთან" მატჩში იგი განაცხადშიც კი ვერ მოხვდა.
იმავეს ვერ ვიტყვით ევროპა ლიგაზე, სადაც "იუნაიტედის" სასტარტო შემადგენლობაში სერხიო რომერო გამოდიოდა და როგორც პორტუგალიელმა მწვრთნელმა აღნიშნა, ფინალშიც იგი ითამაშებს. ეს კი ნიშნავს, რომ გაუთვალისწინებელი შემთხვევა თუ არ მოხდა, დავიდი მიმდინარე სეზონში ვერცერთ მატჩს ვერ ჩაატარებს, რადგან პრემიერ ლიგის ბოლო ტურის მატჩში "წითლების" კარს მესამე მეკარე, ჟოელ კაშტრუ პერეირა დაიცავს.
თუმცა, მოურინიო იმედოვნებს, რომ ეს ფაქტი დე ხეას ტრანსფერის ირგვლივ გავრცელებულ ჭორებს ხელს არ შეუწყობს და ესპანელი კლუბში დარჩება, რის შემდეგაც თავის მომდევნო მატჩს ლოს-ანჯელესში ჩაატარებს.
"ვფიქრობ, პირველ მატჩს ლოს-ანჯელესში "ლოს-ანჯელეს გელექსის" წინააღმდეგ ითამაშებს. იმედი მაქვს, რომ "კრისტალ პალასთან" ჟოელს ვათამაშებ, ხოლო ფინალში სერხიოს და იმედია, ამ ორ მეკარესთან დაკავშირებით პრობლემები არ გვექნება. დავიდი მსოფლიოში საუკეთესო მეკარეა და ჩვენ ნამდვილად გვსურს მისი შენარჩუნება", - განაცხადა მოურინიომ.