კვირას "ტოტენჰემთან" მარცხმა "იუნაიტედს" მათემატიკური შანსიც კი მოუსპო ოთხეულში შესვლისა, რისთვისაც თავის მხრივ "ლივერპული", "მანჩესტერ სიტი" და "არსენალი" ჯერ კიდევ იბრძვიან.
"წითელ ეშმაკებს" ჩემპიონთა ლიგაზე მოხვედრის ერთადერთი შანსიღა რჩებათ, თუ მოურინიოს გუნდი ევროპა ლიგის ფინალში "აიაქსს" დაამარცხებს, მანჩესტერული კლუბი მომდევნო სეზონში ევროპის ყველაზე პრესტიჟულ ტურნირზე იასპარეზებს.
იმ შემთხვევაში, თუ "მანჩესტერ იუნაიტედი" ევროპა ლიგას ვერ მოიგებს, კლუბი "ადიდასსგან" 21 მილიონი ფუნტით ნაკლებს მიიღებს.
"არ ვარ გაბრაზებული, რადგან ეს გადაწყვეტილება უნდა მიგვეღო. ხალხი ამბობს, რომ გავრისკეთ, მაგრამ ასე არ მოვქცეულვართ, ევროპა ლიგა არ აგვირჩევია - ჩვენ იძულებულები ვიყავით, რომ ასე მოვქცეულიყავით. რადგანაც ეშლი იანგი, ლუკ შოუ, მარკოს როხო, ზლატან იბრაჰიმოვიჩი და ტიმ ფოსუ-მენსა რომ მყოლოდა, როტაციას შევძლებდი, ყველა მატჩში მოსაგებად ვითამაშებდით. მაგრამ, როცა 14, 15 ფეხბურთელი გყავს, ამას ვერ იზამ. ძალიან მარტივია." - განაცხადა "ტოტენჰემთან" მატჩის შემდგომ პორტუგალიელმა სპეციალისტმა.
შეგახსენებთ, რომ ფინალი 24 მაისს, სტოქჰოლმში გაიმართება, სადაც "იუნაიტედი" ამსტერდამის "აიაქსს" დაუპირისპირდება.